بلوچ سرمچارانی سوبمندیں اُرشانی بیر چَہ بلوچ زندانیاں گرگ بوگ ءَ اِنت ' بلوچ نیشنل وائس

شال : بلوچ نیشنل وائس ءَ بلوچ آجوئی لوٹوکیں راھشون جلیل ریکی ءُ ٹھیکہ دار یونس ءِ زندان ءِ تہ ءَ کوش زورگریں ریاست ءِ جبر ءُ سرکاری چیریں ادارھاںی ریاستی دھشت نامینان ءَ گوشتگ کہ بلوچ جھدکاراں بلوچ دژمن ریاست ھمے کچ ءَ ترس آماچ کرتگ کہ دژمن ءِ لکھاں فوج ، ایٹمی واکمندی ءِ گپ ءُ دگہ ریاستی واک ءُ توان ایوک پہ بلوچ جنگی زندانیانی زندانی کوش ءَ کار مرد بوگ ءَ اَنت ۔ جارکش ءَ گوشتگ کہ بلوچستان ءِ کجام ھم کنڈے ءَ بلوچ سرمچار زورگریں ریاست ءِ مزسر ءَ کارکنوکیں لشکر ءِ سر ءَ اُرش کن اَنت گٰڑا دژمن ءَ سر گنوکی گیپت ءُ آ وتی زندان ءُ شکنجہ جاھانی تہ ءَ سالانی سال بند ءُ لٹ کٹ بیوکیں بلوچ زندانیاں وتی بیر ءِ دیناں کش اِیت ۔ بلوچ راج ءَ آجوئی ءِ جھد تمنی جوزگانی پد ءَ یا گوں بے سنچی ءَ بنا نہ کرتگ بلکیں بلوچ زرمبش نوکیں سائنسی ، لیکو ی ، پگری ، آشوبی ءُ بیست ءُ یکمی کرن ءِ لوٹاں ھمدپ ءُ چَہ اے لوٹاں آژناکیں جھدکاریں سنگتانی برورد ءَ اے کچ ءَ سر بوتگ کہ دژمن ءِ سرجمیں ریاستی انفراسٹرکچر ءُ زور ایوک بلوچ زندانیاںی ماں زندان ءَ کشگ ءِ سر ءَ ھرچ بوگ  ءَ اِنت ۔بلوچ آجوئی لوٹوکیں راھشون جلیل ریکی ءِ کماش ماماقدیر بلوچ ءِ پہ وتی دلبند ءِ پجیگ ءَ دگہ بلوچ زندانیاںی پہ سلامتی درکنگ ءَ دراجیں جھد ءُ تکانسریاں ابید ھم  جلیل ریکی ءِ دیم شریتگیں میت ءِ دزکپگ بلوچ راج ءِ دیم ءَ ربڑ اسٹیمپ دادگس ، نامے کمیشن ءِ پجیگ ءَ پاکستان ءِ درائیں ادارھاںی دیم ءِ دموکا دیر کرتگ ءُ آھانی راستیں چیدگ درا بوتگ ۔ھما لھتیں ناسرپدیں بلوچ کہ دنیگت چَہ ریاستی فورسز ، انٹلی جنس ادراہ ، دادگس ءُ پارلمیان ءَ اُمیت وار اَنت آ چَہ وتی ضمیر ءِ توار ءَ چَہ دژمن ءِ سرپ ءَ در بہ کپ اَنت ءُ بلوچ کاروان ءِ بھر جوڑ بہ بنت ۔ یک ھبرے کہ ما دلگوش داتگ اِیش اِنت کہ ھروھدے ریاستی ڈیتھ اسکواڈ ءِ سول سروک رحمن ملک  وتی گاماں بلوچ سرزمین ءَ ایر کنت گڑا ھمائی ءِ سوجانی پد ءَ بلوچ راج ءِ نامی ئیں راھشونانی میت چگل دیگ بنت ۔ جلیل ریکی ءُ ٹھیکہ دار یونس ءِ میتانی دزکپگ رحمن ملک ءِ ھمے زوت ءَ شال ءَ آیگ ءِ کارپدانی برورد اِنت ۔ اسلام آباد ءُ چیردستیں آُستان سرکار ءِ ڈیتھ اسکواڈ ءِ سروکاںی ایراد ءُ ایرجیگی ءَ میان اُستمانی تک زوت دلگوشداری بہ دنت ءُ میان اُستمانی دادرسیں دادجاہ ءَ ایشانی سر ءَ کیس بہ بیت ۔بلوچ راج ءَ جنجال ءُ تکانسرکنوکیں راھانی گچین کنگ ءَ پیش یک بے راھبند ، بے دود ءُ چَہ میان اُستمانی راھبنداں دریں دژمن  ءِ دپتر ءِ تجربگ کرتگ ۔دژمن ءِ  رستری، بے رھمی ، جبر ءُ زوراکی ءَ بلوچ راج بیھ نہ ترس اِیت ۔ گوں آس ھوناں گوازی کنوکاں پترشگاں ترسینوک راستی ءَ وت بیم کپتگ اَنت ۔بلوچ راج بے سار نہ اِنت کہ آ چَہ وتی دژمن ءَ پل گوارگ ءِ اُوست بہ بند اِیت بلکیں چَہ مات ءِ کنٹ ءِ بہ گر داں گور ءَ لجدار ءُ سنچداریں راج ءِ پسگ ءِ بستار ءَ زورگریں دژمن ءِ دیم ءَ میلانک بوگ ءَ ساڑی اِنت ۔