انسانی حقانی پانکجن جبر آماچیں بلوچاں ھمدست بہ بنت ' بلوچ ھیومین رائٹس

کراچی ءَ بوتگیں زھرشانی ءِ تہ ءَ جنین آدماں ھم بھر زرتگ

کراچی : بلوچ ھیومین رائٹس آرگنائزیشن ءِ چیردستی ءَ بلوچ راھشون ءُ بی آر پی ءِ بنجاھی ھالرسان جلیل ریکی ءُ ٹھیکہ دار یونس ءِ دیم شریتگیں میتانی دور دیگ،بلوچستان ءِ چَہ راھبند ءَ دریں زور گری ،  بلوچ سیاسی جھدکارانی پجیگ ءَ دگہ بلوچانی آوار جنگ ءُ دیم شریتگیں میتانی دور دیگ ءُ انسانی حقانی لگتمالی رنگیں پاکستان سرکار ءِ کرتگیں کارانی ایرجنگ ءَ کراچی پریس کلب ءِ  دیم ءَ زھرشانی کنگ بوتگ ۔ زھرشانی کنوکاں گوشتگ کہ 23 نومر ءَ چَہ شیراز مند ءَ جلیل ریکی ءُ ٹھیکہ دار یونس ءِ میت دزکپتگ اَنت کہ جنگ چوپگ ءَ پد کشگ بوتگ اَنت ۔ جلیل ریکی 13فروری 2009ءَ چَہ شال ءِ میتگ سریاب ءَ آوار جنگ بوتگ ءُ پنجگور ءِ جاھمندیں یونس بلوچ 22 جون 2011 ءَ  چَہ روکپتی بلوچستان ءَ اِیرانی فورسزاں دزگیر کرتگ ءُ 18 اگست ءَ پاکستان ءِ دست ءَ داتگ ءُ پاکستانی فورسز ءَ کشگ ءَ پد آئی ءِ میت دور داتگ ۔ زھرشانی کنوکاں گوشتگ کہ پاکستان ءُ ایران دیناداسی انسانی حقاں لگتمال کنگ ءَ اَنت ءُ بلوچ سر مچار ءَ گوں برجاھیں جنگ ءِ تہ ءَ میان اُستمانی راھبنداں سر گوز کنگ ءُ سیاسی کارکن ءُ بے میاریں شھرونداں نشانگ کنگ ءَ اَنت ۔ دومی نیمگ ءَ بلوچستان ءَ بلوچانی سرجمیں انسانی حق پچ گرگ بوتگ اَنت ۔ زھرشانی کنوکاں دنیا ءِ آزادی ءُ دادرسی پسند کنوکیں لس ءُ انسانی حقانی پانک جنیں گل ءَ گوں دزبندی کرتگ کہ آ گوں بلوچ راج ءَ بیوکیں جبر ءُانسانی لگتمالی ءِ ایرجنگ ءَ بلوچانی کمک ءُ ھمکاری بہ کن اَنت داں  بلوچستان ءَ برجاھیں ریاستی دھشت گردی ءُ جبر ھلاس بہ بیت ءُ بلوچستان ءِ پجیگ ءَ سرجمیں دنیا ءَ آجوئی، ایمنی ءُ دادرسی ءِ جھد سوبمند بہ بیت ۔