شھید جلیل ریکی ءُ شھید ٹھیکہ دار یونس ءِ دیم شریتگیں میتانی سر ءَ پہ پاکستان ءِ ایرجنگ ءَ بی این ایف ءَ پنجگور ءَ دربندی کرتگ ءُ تربت ءَ ھپت روچ ءَ بینک ءُ ڈاکخانھانی بند کنائینگ ءِ جار جتگ

پنجگور: چَہ  مند ءَ بی آر پی ءِ راھشون جلیل ریکی ءُ بی این ایم ءِ ٹھیکہ دار یونس ءِ میت ءِ دزکپگ ءِ ایرجنگ ءَ چَہ بی این ایف ءِ نیمگ ءَ سرجمیں پنجگور ءَ دربندی کنگ بوتگ  تربت ءَ ھم ھپت روچ ءَ ھرجاپ ءُ زھرشانی ءِ جار جنگ بوتگ اے ھپتیں روچاں بینک ءُ ڈاکخانہ بند کنگ بنت ۔ چَہ اے دربندی ءَ توامیں بازار ، بینک ءُ ھوٹل بند بوتگ ءُ دگانی سر ءَ موٹل گاڑی نئے اَتکگ اَنت ۔زانگ بہ بیت کہ بی این ایم ءِ راھشون محمد یونس 22جون 2011ءَ ایرانی سرکار ءَ ماں روکپتی بلوچستان ءَ دزگیر کرتگ ءُ 18 اگست ءَ تفتان ءَ پاکستانی سرکار ءِ دست ءَ داتگ چَہ ھمود ءَ آ بیگواہ کنگ بوتگ ءُ گوستگیں 23 نومبر ءَ آئی ءِ میت گوں بی آر پی ءِ جلیل ریکی ءَ دزکپتگ ٹھیکہ دار محمد یونس تسپ غریب آباد ءِ مانشجاہ ءَ ماں ھاکانی میار کنگ بوتگ ۔جلیل ریکی ءِ میت گوستگیں پنچشمبے ءَ آئی ءِ کھول ءِ مردماں پجارگ ءَ پد سوراب ءَ برتگ ءُ ھمود ءَ ماں بلوچ گلزمین ءِ ھاکانی میار کرتگ ۔شھید جلیل ریکی چَہ دو سال ءُ نیم ءَ برز اِنت پاکستانی شکنجہ جاھاں بند بوتگ ۔