میان اُستمانی ادارہ زبانی گپ جنگ ءِ بدل ءَ پہ بلوچانی کشت ءُ کوش ءِ دارگ ءَ تچکیں گامگیج بہ زور اَنت ،'بی آر پی

شال : بلوچ ری پبلکن پارٹی ءِ بنجاھی جارکش شیر محمد بگٹی ءَ جلیل ریکی ءِ دیم شریتگیں میت بلوچ نسل کشی ءِ درچ نامینتگ ءُ گوشتگ کہ ریاستی ادارھاں 13 فروری 2009 ءَ جلیل ریکی آوار جنگ ءَ پد بیگواہ کرتگ ۔ریاستی شکنجہ جاھاں چَہ انسانیت ءَ دریں لٹ کٹ کنگ ءَ پد آئی ءِ چَہ تیراں سپتگیں میت تربت ءِ دمگ مند ءَ دور دیگ بوتگ ۔ جلیل ریکی ءَ شاہ ء شھیدان نواب اکبر خان بگٹی ، آشوب ءِ شھید نوابزادہ بالاچ مری ءُ دگہ بلوچ شھیدانی پیم ءَ پہ وتی سرزمین ءِ پھریزگ ءَ سرندر کرتگ ۔ جارکش ءَ گوشتگ کہ ریاستی جبر ءُ زور مروچی یک درچ ءَ برجاہ اَنت ۔ ریاست ءِ دادرسیں ادارھاں جلیل ریکی ءُ دگہ بلوچ پسگانی درا کنگ ءِ بازیں پرمان داتگ بلے ایشی ءَ ابید ھم بلوچ دژمن پالیسیانی سر ءَ کار کنگ بوگ ءَ اِنت ۔آوار جتگیں بلوچ سلامتی ءَ در کنگ ءِ بدل ءَ آھاںی دیم شریتگیں میت بلوچستان ءِ کنڈ کنڈ ءَ چگل دیگ بوگ ءَ اَنت آھاںی تہ ءَ  بی آر پی ءِ بنجاھی جارکش شیر محمد بگٹی ءِ برات شاہ محمد بگٹی ، شیر محمد بلوچ ، مرید بگٹی ، جلیل ریکی ءِ پجیگ ءَ بی آر پی ءِ 26 راھشون ءُ جھدکار شھید کنگ بوتگ اَنت ۔ وھدے کہ ثناء سنگت ءِ پجیگ ءَ 20 جھدکار دنیگت ریاستی شکنجہ جاھاں لٹ کٹ سگگ ءَ اَنت ۔ چَہ میان اُستمانی ادراھانی نیمگ ءَ بلوچستان ءَ انسانی حقانی لگتمالی ءِ سر ءَ بے تاھیری درشان کنگ بوتگ بلے ما لوٹ اِیں کہ زبانی گپ جنگ ءِ بدل بلوچستان ءَ دزمانجنی بہ کن اَنت ءُ بلوچانی چکچین کنگ ءِ دارگ ءَ پر اسریں گامگیج بہ زور اَنت ۔ آئی ءَ گوشتگ کہ جلیل ریکی ءِ ندریگ ، بلوچ گلزمین ءِ سر ءَ ندر بوگ ءِ درچ اِنت پہ ماتیں گلزمین ءَ ندر بیوکیں پسگاں دپتر مدام یات کنت ۔چَہ بی آر پی ءِ نیمگ ءَ جلیل ریکی ءِ شھادت ءَ چل روچ ءِ پرس ءُ سئے روچ ءِ دربندی ءِ جار جنگ بوتگ ءُ جھدکاراں گوشگ بوتگ کہ شھیدانی ندریگاں تاوان بوگ ءَ میل اَنت ءُ پہ ھما مُولاں کہ شھیداں وتی جان ندر کرتگ پہ آ منزل ءِ گرگ ءَ داں وتی ھون ءِ گڈی ترمپ ءَ جھد بہ کن اَنت ۔