چَہ ندریگ ءُ شھادتاں آجوئی لوٹوک گیش بیان اَنت ' چِیئرمین بی این ایم

شال : بلوچ نیشنل موومنٹ ءِ چیئرمین خلیل ءَ  بی آر پی ءِ بنجاھی راھشون جلیل ریکی ، بی این ایم ءِ باسک ٹھیکہ دار یونس ءِ شھادت ءَ سھرسلام پیش کرتگ ءُ گوشتگ کہ اے پسگاں وتی ندریگانی دپتر برجاہ داشتگ ءُ چَہ دژمنانی نیمگ ءَ انسانیت سوچیں شکنجہ گوں دلیری ءَ سگ اِتگ اَنت ءُ داں زند ءِ گڈی دم بلوچ گلزمین ءِ آجوئی ءِ نامءَ کرتگ ۔ دژمن مروچی تہ ءُ ڈنی جنجالاں دوچار اَنت ۔ بلوچ راج ءِ آجوئی ءِ جوزگانی دیپمانی کنگ ءِ بدل ءَ گوں بزدلی ءَ بلوچ پسگاں آوار جنگ ءُ شھید کنگ ءَ اِنت ۔ بلوچ راج ءِ پسگانی مھکمی ھم بستگی ءِ سبب اِنت کہ چَہ ھمک بلوچ پسگ ءِ ندریگ ءَ آجوئی ءِ منوکانی کساس گیش بیان اِنت کہ اے ھبر ءَ گواچن کنت کہ زانت ءُ سنچ ءَ گوں بلوچ راج آجوئی ءِ جھد کنان وتی منزل ءِ نیمگ ءَ گوں آشوبی راہ بند ءُ دودربیدگاں گام جنان اِنت ۔ گوستگیں روچاں زاھد حسین ءُ مولانا عبدالخالق دژمن لشکر ءَ ھمے رنگ ءَ شکنجہ کرتگ ءُ شھید کرتگ اَنت اے توامیں پسگانی ندریگانی مراد بلوچ راج ءِ آجوئی ءُ وژھالی اِنت ءُ پروش دژمن ءِ بھت ءَ نوشتگ ۔