چَہ جبراکی ءُ زوراں آجوئی ءِ زرمبش ھلاس نہ بیت ورنا نوکیں لیکوی پھتوی ءَ گوں راجی کاروان ءِ بھر بنت ' بی ایس او آزاد

شال: بی ایس او آزاد ءِ بنجاھی جارکش ءَ بی آر پی ءِ سروک جلیل ریکی ءُ 22جون ءَ چَہ ایرانی فورسز ءِ دست ءَ دزگیر بوگ ءَ پد 18 اگست ءَ پاکستان ءِ دست ءَ دیگ بوتگیں بی این ایم ءِ راھشون ءُ آزادی پسندیں جھدکار ٹھیکہ دار محمد یونس ءِ دیم شریتگیں میتانی دزکپگ دژمن ءِ بدتریں سرگنوکی اِنت کہ وتی پروش ءِ نزیک گندگ ءَ پد رستری کنگ ءَ اِنت ءُ وتی سوچ ءُ پگر ءِ ھساب ءَ  آزادی پسنداں کشگ ءَ اِنت داں بلوچ آجوئی ءِ زرمبش ھلاس بہ بیت بلے چَہ اے رنگیں جبراکی ءُ زور دگہ زورگراں ھم چیردستیں راج ءَ گوں کرتگ بلے وتی زورگری برجاہ داشت نہ کرتگ اَنت ءُ چَہ چیردستیں راجانی دست ءَ شرمناکیں پروش اِش رستگ ءُ مروچی ٹپ ماں ٹپ بلوچستان ءِ پر ھاٹیگ ءُ دلیریں ورنا ءُ کماشانی میتانی دزکپگ ءَ پد اے دژمن ءُ آئی ءِ بھازرتگیں کاسگ چٹانی ردمنی بیت کہ آ بلوچستان ءَ وتی زورگری ءَ برجاہ داشت کن اَنت ۔ بنجاھی جارکش ءَ گوشتگ کہ شھید جلیل ریکی پیمیں مزن نامیں آشوبی ءُ پر ھاٹیگیں راھشونے ءِ شھادت یک دردناکیں کارے بلے دپتر گواچن اِنت کہ اے رنگیں مزن نامیں راھشونانی شھادت ءَ پد ورنائیں پدرریچ یک نوکیں پگر ءُ لیکوی پھتوی ءَ گوں راجی کاروان ءِ بھر بنت ۔ جارکش ءَ گوشتگ کہ شھید جلیل ریکی ءُ شھید محمد یونس ءُ دگہ شھیدانی نام،  آھانی جھد ءُ ندریگ مدام زندگ بنت ۔