گوادر ءِ کاسگ چٹیں بلوچستان سرکار ءِ زمستانی بنجل بوگ ءَ پد بازیں جاھانی ریڈ زون کنگ ءِ گمان اِنت

گوادر [ بیورو ، روتاک توار ] گوادر ءِ پاکستان ءِ کاسگ چٹیں بلوچستان سرکار ءِ زمستانی بنجل جوڑ بوگ ءَ پد سیکورٹی ءِ ترند گریں بندبست بنا کنگ بوتگ اَنت ۔ چَہ پٹ ءُ پولکاری ادارھانی نیمگ ءَ درملکی شمار کنگ بوگ ءَ اَنت ۔ جند اللہ ءِ پجیگ ءَ دگہ گلانی چاریگی کنگ بوگ ءَ اِنت ۔ باوریں ھالدیوکانی ھالانی رِد ءَ آیوکیں ماہ ءَ بلوچستان اسمبلی ءُ کابینہ ءِ دیوان ءِ میان ءَ چوشیں کارے مہ بیت کہ پہ سرکار ءَ تاوان بہ بیت پمیشکا سرجمیں شھر ءَ پٹ ءُ پولکاری ادارھانی نیمگ ءَ اوگانی ، بنگالی ، ایرانی ءُ دگہ درملکی شمار کنگ بوگ ءَ اَنت۔ اسلام آباد سرکار ءُ چیردستیں بلوچستان اُستان سرکار ءِ ھالدھیں وزیر ءِ نیمگ ءَ جند اللہ پجیگ ءَ دگہ گلانی چاریگی کنگ ءِ پرمان ءَ پد اے کار ءِ ذمہ واراں وتی سرگرمی بنا کرتگ اَنت۔ رستگیں ھالانی رِد ءَ آیوکیں ماہ ءَ بلوچستان اسمبلی ءُ کابینہ ءِ دیوان ءِ میان ءَ بازیں جاھانی ریڈ زون کنگ ءِ ھم گمان ھست ۔