جام یوسف اگاں پشومان اِنت گڑا منی کماش ءِ سر ءَ بوتگیں لشکر کشی ءِ رازانی پدر کنگ ءَ دیر مہ کنت بلکیں گناھانی بار ئِے کمتر بیت ' جمیل اکبر بگٹی

شال : شھید اکبر خان ءِ بچ جمیل اکبر بگٹی ءَ پاکستانی سیاستدان مشاھد حسین ءِ گپانی سر ءَ گوں ترندی ءَ ایراد گیپتگ ءُ گوشتگ کہ مروچی فوجی ءُ سیاسی واکداراں الزام دیوکاں زیک اخلاقی جرات پیش نہ داشتگ مروچی آھانی بیان بے بزانت اَنت ۔ گوں آن لائن ءَ گپ جنان ءَ آئی ءَ گوشتگ چَہ مشاھد حسین ءِ نیمگ ءَ اے بیان کہ نواب اکبر خان بگٹی ءَ گوں گپ ءُ تران ءَ پد کرارنامہ بندگ بوتگ بلے آ وھد ءِ سیاسی ءُ فوجی واکاں اے کرارنامہ ءِ سر ءَ گامگیج زورگ نہ اِشتگ ، اے ھبر دروگ اَنت مشاھد حسین سید ءُ چوھدری شجاعت ءِ گوں منی کماش ءَ ھچ کرار بندگ نہ بوتگ پرچا کہ اے مردم ڈیرہ بگٹی ءَ اَتکگ اَنت منی کماش ءِ گوں ایشاں اولی جست ھمے بوتگ کہ شمئے گور ءَ داں چِہ کچ ءَ مینڈیٹ ھست ءُ اے میان آھاں کلاکانی کلاک گوں جی ایچ کیو ءَ گپ جتگ ءُ پد ءَ آیگ ءِ گوشتگ ءُ شتگ اَنت گڑا کماش ءَ ھما وھد ءَ گوشتگ کہ منی ءُ وتی وھد ءَ ھراب مہ کن اِت ۔ جمیل اکبر بگٹی ءَ گوشتگ کہ داں ھما وھد ءَ کہ مشرف ءَ وتی پوست بزاں وردی در نہ کرتگ مشاھد حسین سید یا آئی ءِ پارٹی ءَ اے اخلاقی جرات نہ بوتگ کہ اے ھبر ءَ بہ کنت اگاں بوت اِنت گڑا ڈیرہ بگٹی ءِ آیگ ءِ وھد ءَ منی کماش ءَ اے گوشتگ اِت اِش کہ ما گپ ءُ تران لوٹ اِیں بلے اسٹبلشمنٹ ءُ فوجی واکدار اے ھبر ءَ نہ لوٹگ ءَ اَنت بلے آھاں اے رنگ ءَ نہ کرتگ ۔ ایرجنگ ءِ گپ اِنت اے رنگیں دوپوستی ایم کیوایم ءَ ھم پیش داشتگ کہ ءُ ڈیرہ بگٹی ءَ آپریش ءِ سر ءَ استعفی دیگ ءِ جار جتگ بلے مارا گوں ایم کیوایم یا فوجیانی کنٹ ءَ نشتگیں واک ءَ گوں ھچ رنگیں اُمیت نہ بوتگ ءُ نہ کدی بیت ۔ نوں اے رنگیں بیان دیگ آئی ءَ نہ براہ اِیت ۔ یک جستے ءِ پسو ءَ آئی ءَ گوشتگ کہ مشرف ءِ نوبت ءَ اُستان ءُ اسلام آباد سرکار ءِ منگ ءُ تپاکی ءَ بلوچستان ءَ لشکر کشی بوتگ ۔اے دور ءِ ھچ سرکاری نمائندگ وت ءَ بے میار لیک اِت نہ کنت ابید چَہ ایشی ءَ شوکت عزیز ءَ عدالت ءَ اے من اِتگ کہ فوجی افسراں آ کاربستگ بلے چَہ  ایشی ءَ ابید ھم من آئی ءَ بے میار نہ من آں ۔ اگاں جام یوسف منی کماش ءِ سر ءَ بوتگیں لشکرکشی ءِ درگت ءَ رازے پدر کنگ لوٹ اِیت گڑا آ کجام نوبت ءِ ودار کنگ ءَ اِنت؟ آئی ءِ میار پھل کنگی نہ اِنت بلے اگاں آ سرپد بیت کہ چَہ آئی ءِ راستی ءَ آئی ءِ گناھانی بار سبک تر بوت کنت گڑا باید دیر مہ کنت ۔