زورگر ءَ چَہ پیلپزپارٹی پاکستان ءِ سرکار ءِ دور ءَ بلوچانی جونانی چگل دئیگ بندات کُرتگ' کچکول ایڈوکیٹ
Monday, August 04, 2014
بلوچ نیشنل موومنٹ ءِ راھشون
کچکول علی ایڈوکیٹ ءَ ھاکمانی اے درشان دروگ گْوشتگ کہ گْوشگ بوتگ بلوچستان ءَ ٹپ ءُ ٹوریں جونانی دور دیئگ ءِ نا پاک ءُ در انسانی کرد ءَ اُستانی
ادارہ ھوار نہ اَنت ءُ آیانی نیمگ ءَ اے بابت ءَ پٹ ءُ پول کنگ ءِ گْوشگ بوتگ۔چَہ اوسلو ءَ شنگ کُرتگیں درشان ءَ آئی ءَ گْوشتگ کہ چَہ توامیں جبراں ابید اُستانی ادارھاں بلوچ راج ءِ جوزگ ءُ جوش ءِ دیم ءَ پروش ءِ دیمپانی بوت گڑا آیاں نہ ایوک ءَ بلوچ ورنا ءُ سیاسی باسکانی آوار جنگ بندات کُرت بلکیں چَہ پیپلز پارٹی ءِ گْوستگیں سرکار ءِ زمانگ ءَ جونانی دور دیئگ ءِ رِد ھم بندات کُرتگ ۔ چہ تربت ءَ بلوچ راجدوستیں راھشون واجہ شھید غلام محمد،شھید لالا مُنیر ءُ شیر محمد بلوچ اُلس ءِ دیم ءَ اُستانی چیریں ادارھاں آوار جت اَنت ءُ پدا آیانی جون دور دات اَنت ۔ ھمے وڑ ءَ چَہ گار ءُ بیگوائیں مردماں باز ءِ جون دور دیئگ ءِ جیڑھاں شَہ آمید گس ءَ گْوشت کہ اُستانی چیریں اداراہ ھوار اَنت۔
چہ اشی ءَ پد سرکاری واکانی نیمگ ءَ اے جیڑہ ءِ تہ ءَ چیریں ادارھانی ھوار نہ بوگ ءِ درشان یا اشانی پٹ ءُ پول ءِ بابت ءَ درشان کنگ پہ راستی بلوچستان ءِ اُلس ءُ میاں اُستمانی برادلانی گُمراہ کنگ ءِ کوشست اِنت ۔اے کوشست ءِ تہ ءَ آ وتگڑیں راجدوستیں گَل ھم ھوار اَنت ،ھما کہ بلوچ ءِ گوں دژمناں ھوار بوتگ اَنت آ نوں کدی بلوچستان ءِ جیڑھانی ھنکین ءَ پُترگ ءُ کدی دگے اصطلاھانی دُروشم ءِ وڑیں کارپداں دگرانی سر ءَ لڈگ ءِ جُھد ءَ گلائیش اَنت۔بلکیں چَہ وتگڑیں راجدوستانی اے وڑیں کوشستاں ءَ آ پہ وتی لھتیں روچانی اقتدار ءَ بلوچ راج ءِ دژمناں وش کُرت کن اَنت بلۓ بلوچ راج ءَ کدی گمراہ کُرت نہ کن اَنت۔ گُڈ سرءَ آئی ءَ دستبندی کُرتگ کہ میاں اُستمانی برادل بلوچ ءِ کُشت ءُ کوش ءَ دلگوش بہ کن اَنت ءُ بلوچ اُلس ءَ چَہ در انسانی کرداراں پھریزگ ءَ وتی کرد ءَ پیلو بہ کن اَنت ۔
Comments[ 0 ]
Post a Comment