یورپی یونین چَہ فرانس ءِ سوج ءَ یک دسمبر ءَ ایران ءِ سر ءَ تیل درآمد کنگ ءِ بندش جت کنت ' وال اسٹریٹ جرنل

نیویارک : یورپی یونین چَہ یک دسمبر ءَ ایران ءِ سر ءَ تیل درآمد کنگ ءِ بندش جت کنت ۔ فرانس ءِ ڈنی کارانی وزیر انی یک دیوانے ءَ اے درگت ءَ شور ءُ سوڈگ کنگ بوتگ ۔ پنچشمبے ءَ  فرانس ءَ ایران ءِ سر ءَ تیل درآمد کنگگ ءِ بندش جتگ پد ءَ وتی گامگیج نرم کرتگ ءُ گوں یورپی یونین ءِ تپاکی ءَ گامگیج زورگ ءِ ھبر من اِتگ ۔ یورپی یونیں ءَ چَہ ایشی ءَ پیش شام ءِ سر ءَ ھم تیل درآمد کنگ ءِ بندش جتگ اَت ۔امریکہ ءِ روتاک وال اسٹریٹ جرنل ءِ رپورٹ ءِ رِد ءَ یورپی یونین ءِ واکدارآیوکیں ھپتگ ءَ چَہ فرانس ءِ نیمگ ءَ ایران ءِ سر ءَ تیل درآمد کنگ ءِ بندش ءِ سوج ءِ سر ءَ چار بچار کن اَنت ۔ ایران ءِ نیمگ جوھری بم اڈ کنگ ءِ جیڑہ  ءِ سر ءَ دنیا ءِ سیمی مستریں تیل درآمد کنوک ءِ سر ءَ بندش ءَ چونیں اثرات پیداک بنت اے درگت ءَ یورپی یونین ءِ ڈنی کارانی وزیر پنچشمے روچ ءَ چار بچار ءُ شوربندی کن اَنت ۔ سفیرانی گوشگ اِنت برسلز ءَ یک ٹیمے اے درگت ءَ پیسر ءَ سوڈگ کنگ ءَ اِنت ۔ واکدارانی رِد ءَ چَہ اے کار ءَ ایران سک باز گیر بیت ۔ اے درچ ءَ چَہ یک دسمبر ءَ برسلز ءَ یورپی یونین ءِ ڈنی کارانی وزیرانی دیوان ءَ پیش فرانس گوں آھاں گپ ءُ تران کنگ ءَ اِنت ۔ زانگ بہ بیت یورپ چَہ ایران ءَ تیل زوروکیں مستریں گراگاں شمار بیت ۔