مھمندایجنسی: نیٹو ءُ ایساف ءِ پاکستان ءِ دو چیک پوسٹانی سر ءَ اُرش ءَ بیست ءُ شش پاکستانی سپاھیگ مرتگ ءُ چاردہ ٹپی بوتگ

پشاور : مھمند ایجنسی ءَ نیٹو ھیلی کاپٹراں پاکستانی چیک پوسٹے ءِ سر ءَ اُرش کرتگ ءُ بیست ءُ شش  پاکستانی سیکورٹی کارندہ کشتگ ءُ چاردہ ٹپی کرتگ ۔ پاکستان  ءَ چَہ اے کار وتی من ءَ پیشگیں رنگ ءَ باھند کرتگ ءُ پہ پیش دارگ پاکستان ءِ ڈنی کارانی وزارت ءُ پاکستانی فوج ءَ ترند ی ءَ ایراد گیپتگ ءُ نیٹو ءِ چَہ بلوچستان ءِ راہ  ءَ بیوکیں سپلائی داشتگ ۔ دومی نیمگ ءَ نیٹو ءِ جارکش ءَ دنیگت ھمے گوشتگ کہ تپاکیں لشکر اے درگت ءَ سرپد اِنت ءُ گیشتریں مالومداری یکجا کنگ ءَ اِنت ۔ اوگانستان ءَ نیٹو کماندار جنرل جون ایلن ءَ  گوشتگ کہ آ اے درگت ءَ ھورتی ءَ چارگ ءَ اِنت ءُ گوشتگ کہ آ اے درگت ءَ جوانی ءَ پٹ ءُ پول کن اَنت ۔آئی ءَ اے اُرش ءَ مرتگیں ءُ ٹپی بیوکیں سپاھیگانی کھول ءَ گوں ھم دلپدردی درشانتگ ۔اے درگت  ءَ ایساف ءِ گوشگ اِنت کہ ایساف ءِ سروک گوں پاکستان ءَ نہ ایوک سیکورٹی ءِ ھمکاریاں گھتر کن اَنت بلکیں سیمسراںی سر ءَ دھشت گردی ءِ ایرجیگی یے ءَ بیوکیں جنگ ءِ تہ ءَ آپریشنل ھمکاری گھتر کنگ بنت ۔ پاکستان ءِ آرمی چیف اشفاق پرویز کیانی ءَ مھمند ایجنسی ءَ دو پاکستانی چیک پوسٹانی سر ءَ نیٹو ء ُ ایساف ءِ اُرش ایر جتگ ءُ گوشتگ کہ اے اُرش ءِ تہ ءَ انسانی تاوان اُوپار کشیں کارے نہ اِنت ۔آئی ءَ فوجی واکداراں پرمان داتگ کہ آ اے رنگیں غیر ذمہ داریں کارانی دیمپانی ءَ زوت گامگیج بہ زور اَنت ءُ گوں نیٹَو ءُ ایساف ءَ زھرشانی کنان ءَ لوٹ کرتگ کہ اے کار ءِ ذمہ وارانی ایرجیگی یے ءَ ترندیں گامگیج زورگ بہ بیت ۔