من ءَ دُنیا گُشيت دیوانگ ،،،،دومى بهر

............................................................
منفی  کرداں دُژمن نپ چست کنت۔
راجی  سلاہ بندیں گل ماں  ھر  میدان ءَ دُژمن ءَ تاوان دیگ ءِ  بُنیاد ءَ ٹھینگ  بنت۔ فوجی  حوالہ ءَ  بگر تاں معاشی حوالہ ءَ۔۔۔۔فوجی بُنجل او انڈسٹری، ھر میدان ءَ کہ دُژمن وتی  قبضہ  ءِ برجم دارگ ءِ ھاترا نپ  چست  کنت۔ آ ادارھانی سرا اُرش کنگی اِنت۔ بلے  اے وڑ  ھوں  نہ اِنت  کہ  کسے رھگیر  ءُ مُزگیراں (مزدور) پہ اے واستہ بہ  جنت  کہ آ دُژمن قوم ءَ  چہ سیادی  دارنت۔ اگاں اے  وڑ بوت  گُڑا زوراک ءُ ایردست ءِ میان ءَ ھچ وڑیں فرق پش نہ کپیت۔ یا اسکول ٹیچراں بہ جنت کہ آ راج ءِ  زھگانی تب ءُ نفسیات ءَ چہ قومی  ربیت ءُ رھبنداں  گردیننت  ءُ  قبضہ  گیر ریاستی فکر ءُ  مارشتاں زھگانی سرا مسلط  کن اَنت۔( مرچی بلوچستان ءَ کم کم ءَ ھمے کِرد گندگ آیگ ءَ اِنت) اگاں چو بہ بیت تا گُڑا دُنیا ءِ راجی جُنزانی ٹوھیں ٹوھیں رھشون گوستگاں کہ آھاں ھمے قبضہ گیر ریاستی دربرجاھاں  ونتگ ءُ دربُرتگ۔ چیاکہ  نیشنلزم  ءِ مارشت  یک  ھنچیں  مارشتے  کہ آ قوم ءِ ھر زھگ ءِ  نفسیات  ءُ  مارشت  ءَ  گوں  بندوکیں،  اے  مارشت  بدل  بیت  نہ  کنت۔ اگاں  پہ  راستی  بچارے  تا گُڑا دُژمن ءِ  تعلیمی  ادارہ ءِ  تھا ھما زھگ  ءِ نیشنلزم ءِ  مارشت  گیشتر  ردوم  زوریت۔ چیاکہ اودا  زھگ  ءَ  ھمے  مارشت  بیت  کہ آ  آسراتی  کہ  دُژمن  ءِ  زھگ  ءَ رسگ  ءَ انت  من ءَ  چیا  رسگ ءَ  نہ اَنت۔ ھمدا  زھگ ءَ  احساس  بیت  کہ  ادا  گپے  اَست۔ من  غلام آں۔
دومی۔
زھگانی  تھا  ھمے  فکر ءِ ردوم دیگ،  آھانی ذھناں  ھمے  گپے نادینگ  کہ دُژمن ءِ  ادارھانی  تھا وانگ ءَ چہ نیشنلزم ءِ  مارشت  ھتم  بیت۔ زھگ  قبضہ گیر ءِ  منوگر  جوڑ بیت۔ ھمے  وڑیں  گپ  ما  چہ بازیں نادانانی  دپ  ءَ اِش کُتگ۔ کہ قبضہ  گیر ءِ  ادارھانی تھا  وانگ ءَ چہ مارا  ھچ  نپ  نہ رسیت۔ باز وھد ءَ  وانگ ءِ  بائیکاٹ کنگ بیت۔ چکاساں بائیکاٹ  کنگ  بیت۔ پہ  زھرشانی  کلاس  بند  کنگ  بنت۔ دُژمن  وا دُژمن ایں۔۔۔۔ آ وا ھر وڑا تئی  تعلیمی  راہ ءُ درانی بند کنگ ءِ توجیل ءَ  کنت۔ بلے  من  پہ زانت پر آئی ءَ اے  در ءَ مہ  بوجاں۔۔۔۔ آئی ءَ  اے  موہ ءَ  مہ دیاں۔۔۔بلکیں  ھمنچو کم تعلیمی آسراتی من ءَ  قبضہ گیر ءَ پہ لاچاری  داتگ، من  چہ  ھمے کمیں آسراتیاں  گیش ءَ چہ گیش  نپ چِست  کنگ ءِ جُھد ءَ  بہ کناں۔۔۔۔چیاکہ مئے ٹوھیں ٹوھیں  رھشوناں ھمے قبضہ گیر ءِ دربرجاھانی  تھا  ونتگ ءُ  تعلیم دربُرتگ۔۔۔۔ھمیش  ءُ  دگہ اَنچیں بازیں  منفی کِرد ءُ ردیاں کہ پہ لاشعوری  مئے دست ءَ  سرزد بیئگ ءَ اَنت   کہ  پہ  دُژمن  ءَ  سیت  ءُ  پہ  ما  تاواناں۔
.......................................................................
روایت پسندی ءُ ناتجربہ کاری  تاوان دنت.
سوب مندیں راجی جُنزانی بُنکی رھبند جوانیں تکنیک ءُ علمی  رھبندانی سرا ٹھینگ بنت۔ سیاسی  کارندہ ءَ عملی  کرد ءَ گوں ھور یک  جوانیں ءُ مُھکمیں  لیکہے ءِ بُنیاد ءَ آئی ءِ ذھن سازی  کنگ کپیت۔ علم ءُ  عقل ءَ ابیئد راجی روایتانی بُنیاد ءَ سیاسی  کارندھے  جزبھاں چست  کنگ ءُ پہ  نام مرگ ءِ شوق ءَ آئی ءِ تھا ودینگ،، او  پہ اے رھبند ءِ سرا کہ ” ما چاکر ءِ اولادیں  گوھرام ءِ دل ءِ بندیں ” آئی ءَ دُژمن ءِ مقابلہ ءَ اوشتگ ءِ سکین دیگ سکیں غیر سائنسی ءُ ھیالے ءُ دُژمن ءِ کار ءَ آسان کنگ ءِ برابریں۔  چوشیں منفی  ھیال ءُ  ناھودگیں  لیکہ  ما  چہ شاعرانی  شعراں اِش کُتگ ءُ چہ ناداناں در بُرتگ۔ ھر راج ءَ وتی بُنکی روایت  سرگوز کنگی نہ اَنت۔ مارا الم وتی راجی روایتانی ھُنڈالاں  سیراپ بیئگی اِنت۔ بلوچ  قوم سکیں  بھادر ءُ دلیریں  راجی بیتگ ءُ استیں۔۔۔انچو گُشنت  کہ بلوچ ءَ جنگ ءِ میدان ءَ  پُشت  پِر نہ کُتگ۔ بلے  وھد ءُ  جاورانی ھمراھی ءَ روایتانی  پژدرا  نوکیں روایت ردوم  گرنت۔  چو نہ اِنت کہ  زیکیں زیکیں بھادریں بلوچ ءَ ھر میدان ءَ جنگ  کُتگ  ءُ گوں کمیں کچے ءَ دُژمن شکست  داتگ ،مرچی  ھم  ھما وڑ  بہ  بیت۔  راج ءِ ورناھاں ھمے نشوندھی دیگ کہ زیکیں بلوچ ءَ دھلی  ءُ قندھار گِپتگاں شُما  ھوں  ھمایانی  چُک ءُ  نُماسگے۔۔۔ اڑے نادان؛ زیکیں بلوچ  ءِ زھمے  بیتگ ءُ  دُژمن ءِ  ھم  زھمے ،بلوچ کوہ نورد ءُ تیار ءُ مُھکمیں راجی  بیتگ۔ گُڑا الم جنگ ءَ کَٹیت ، بلے مرچی بلوچ سکیں ایردست ءُ بزگیں راجی جوڑ کنگ بیتگ۔ پدا دو مضبوط ءُ مُھکمیں زالمیں ریاستاں گوں دیم پہ دیم اِنت۔ مرچی  ما گندگا اِنت کہ ماں بلوچستان ءَ شھید  بیتگیں بلوچانی  کچ چہ دُژمن ءِ مردماں  دوسری  گیش  بوھان اِنت۔ پدا عام مردم ناں، بلکیں  جوانیں ءُ قابلیں نودربر ءُ سیاسی کارندہ گیشتر شھید بیئگا اَنت،  اے  دُراہ  روایت پسندی ءُ سیاسی  نا پُختگی ءُ نا تجربہ کاری ءِ سوب ءَ بیئگا اَنت۔۔ اَنچیں  سنگت  کہ آھاں وتی بازارءِ مردم نہ زاننت کہ کُجا انت ءُ چے کنگ اَنت۔ بلے دُژمن  چہ اورماڑہ ءَ چستے کنت ءُ شھید یے کنت۔۔۔اے ردے ایوک سیاسی  کارندھے نہ اِنت۔ بلکیں ھما سینئریں سیاسی کارندہ ءُ رھشون ئیگ انت۔۔۔بلے اشانی گورا کسے گپ  بہ جنت گُڑا بزاں شھیدانی توھین ءَ کنگ انت۔۔ ردیانی  سرا ایراد گرگ  غداری ءَ گوں شُمار بیت۔
مُلا فاضل گوشیت.....
                      مَردم  دعوا ءَ  بے درچ ءُ  بے وار  نہ کنت
                     آ   نہ اِنت  مردی  کہ  دوبارہ    وار  نہ کنت
                     یک برے کُستی ءَ نہ رؤت داں سار نہ  کنت
                     آ   چے  مردے  کہ  جدواں   لج دار  نہ کنت
                    جنگ ءَ  گوں  جوریں  دُژمناں  دُمپار نہ کنت
                    ھوناں  گوں  وشبوئیں   دُناں    آتار   نہ کنت
                    شکلیں   واباں  ماں  دیدگاں   اَنگار   نہ  کنت