"سپر ارتھ" (HD 85512 b)

دُنيا همنچو ديم ءَ روان اِنت. اِنسانى علم ءُ زانت همنچو ودّان اِنت. گُشنت كہ علم هما سلاه اِنت كہ چر ايشى ءَ چہ اَنسان هر ميدان ءَ سوب مند بيت كنت. ابئيد ءِ علم ءُ زانت ءَ راج هچ ميدان ءَ سوب مند بيت نہ كنت. همے علم ءِ سوب اِنت كہ اِنسان كائنات ءِ شاهگانياں سر بيتگ. بلے علم ءُ زانت ءَ كَچ ءُ كساس نيست. مَرچى اِنسان آزمان ءِ جُهلانكياں اَنچيں جاه ءُ هَندانى شوهازگ ءِ چن ءُ لانچ ءَ اِنت كہ اودا زِندگ بيئگ ءِ آسراتى چو زمين ءِ وڑا اَست بِباں. اے دَرگت ءَ یورپی  فلکی زانتكاراں آزمان ءِ شاهگانياں ٥٠ اَنچيں سياره شوهازاِتگ كہ مئے وتى زمين ءَ هم شُبين ءُ هم شِكلاں. ايشانى تها ١٦ اَنچىن اَنت كہ ايشانى سرا  اِنسان ءِ نندگ ءُ زِندگ بيئگ ءِ گُمان اَست. اے سيارهانى لڑ ءَ "سپر ارتھ سیاره" آنى نام ديگ بيتگ. "سپر ارتھ" ءِ نامداتيں ١٦ ايں  سياره  مئے زمين ءِ كّچّ ءَ يكے ءَ تاں ١٠ همنچُک بلاهاں.  یورپین سدرن آبزرویٹری ءِ گوشگ ءِ رِدا دنيگہ اے گپ  مَنّگ نہ بيتگ کہ "سپر ارتھ" سياره آنى سرا اِنسان ءِ زِندگ بيئگ ءِ آسراتى اَستاں يا ناں. ايشاں اِنسان وتى نندگ ءِ واستہ كار مرز كُت كنت يا ناں. آئى ءَ گوشتگ آيوكيں ١٠ يا ٢٠ سالاں اے گپ پَكّا زانگ بيت کہ اے پہ زِندگی ءَ جواناں يا ناں.