نیشنل پارٹی ءِ کانگریس آسر بوت ، مزنیں اُگدہ دار درس پیشیگین اَنت

شال : نیشنل پارٹی ءِ گانگریس ءِ بند دیوان آسر بوت ۔ پارٹی گچینکاری ءَ پد مزنیں اُگدہ دار انگت ھما اَنت ءُ ماں گچینکاری ءَ آھانی دیم ءَ کس نہ اُوشتاتگ ۔  ڈاکٹر عبدالمالک نیشنل پارٹی ءِ کماش، حاصل بزنجو کمک کماش ، طاھر بزنجو کار گشاد ، جان محمد بلیدی جارکشءُ ڈاکٹر یاسین نیشنل پارٹی ءِ بلوچستان ءِ کماش   ءِ اُگدہ ءِ سر ءَ بے گچین کاری ءَ سوبمند بوتگ اَنت پرچا کہ اے اُگدھانی سر ءَ دگہ کس آھانی دیم ءَ اُوشتوک نہ بوتگ ۔ دگہ اُگدھدارانی تہ ءَ  زبردست خان پہ سند ھ ءَ کمک کماش ، پہ خیبر پختونخوا ءَ میر اسلم بلیدی کمک کماش ، پہ بلوچستان ءَ انجینئر حمید کمک  کماش ، کمک کارگشاد اول شفقت اللہ لانگو ، دوئم جان محمد بلیدی ،مالیاتی کارگشاد فدا حسین دشتی ، پوریاتی کارگشاد رحمت علی ، دودمانی کارگشاد غنی پرواز ، درانڈیھانی کارگشاد رحمت اللہ رند ، رابطہ کاری کارگشاد خیبربخش بلوچ ، انسانی حقانی کارگشاد واحد رحیم ، سیکریٹری ریسرچ اینڈ ایڈ وائزری کمیٹی منصوراحمد ، وانگ ءِ کارگشاد مھرا ب مری  ءُ  کشاوردی ءُ دریاوردی کارانی کارگشاد عبدالغفار قمبرانی گچین کنگ بوتگ ۔ زانگ بہ بیت کہ نیشنل پارٹی وت ءَ سرجمیں پاکستان ءِ پارٹی گوش اِیت ابید چَہ ایشی ءَ کہ آئی ءِ مارا رستگیں ھالانی تہ ءَ پاکستان ءِ مستریں اُستان پنجاب ءِ اُگدہ دارانی نام نیست بلے آئی ءِ شنگ بوتگیں بیان ءِ تہ ءَ بلوچستان یک اُستانے منگ بوتگ ءُ پہ آئی ءَ پارٹی ءِ اُگدہ دار ھم بنجاھی کانگریس ءَ  گچین کنگ بوتگ اَنت ۔ بلوچستان ءَ نیشنل پارٹی ءِ اُگدھدارانی نام کہ پدر کنگ بوتگ اَنت ایش اَنت   ڈاکٹر یاسین کماش ، اقبال زھری کمک کماش ، عبدالخالق کارگشاد ، منان آزاد جارکش ، ءُ عبدالغفار قمبرانی مالیاتی کارگشاد گچین بوتگ ۔ نیشنل پارٹی ءِ اے کانگریس ءِ تہ ءَ پارٹی ءِ کوھن تر ءُ وتی دور ءِ نامداریں لیڈر ڈاکٹر حئی ءِ بھر زورگ ءِ ھال نیست ۔ ڈاکٹر حئی گوستگیں سیشن ءَ ڈاکٹر مالک ءِ دیم ءَ کماشی ءِ اُگدہ ءِ سر ءَ سوبمند نہ بوگ ءَ پد ھم سیاسی پڑ ءَ چوش ھاموش ءُ بے توار نہ بوتگ کہ چَہ آئی ءَ اے اُوست بندگ بہ بیت کہ پارٹی ءِ کانگریس ءَ نہ روت ، سیاسی پڑ ءَ زانتکاراں آئی ءِ ڈاکٹر مالک ءِ دیم ءَ کپگ پد ھمے گوشتگ کہ نو ڈاکٹر حئی ایوک ءَ نام ئِے پشت کپ اِیت ءُ نوں نیشنل پارٹی ءِ تہ ءَ پہ آئی ءَ ھچ جاہ نیست ۔