گوں حیر بیار مئے گپ ءُ رپ بیتگ۔ رحمان ملک، رحمان ملک سیاھیں دروگ بندیت۔ حیر بیار مری

بلوچ رھشون حیر بیار مری ءَ  رحمان ملک ءِ اے گپ رد کُتگ  کہ آئی ءَ  گوں  بلوچ  رھشون  حیر بیار ءَ کلوہ  ھال  بیتگ۔ بلوچ رھشون ءَ  گوشتگ آئی ءِ گوں رحمان ملک ءَ ھچ وڑیں رابطہ  نہ بیتگ۔  رحمان ملک  سیاھیں  دروگ  بندیت۔ راجی  آجوئی  ءِ  ھاترا جُھد برجاہ مانیت۔ وھدیکہ رحمان ملک ءَ ھالترانے ءَ گوشتگ مئے  گوں حیر بیار ءَ  کلوہ ھال  بیتگ ۔حیر بیار زوت  آزاتی ءِ  لوٹ ءَ  سرگوز بیت ءُ پاکستانی منوگرانی درچ ءَ کئیت۔ بلے بلوچ رھشون ءَ ھندی بلوچی  چینل ءَ ھالترانے ءَ اے سرجمیں گپاں رد کنان ءَ گوشتگ کہ آزاتی  منی  ایمانیں ، من مرچی آزادی  ءِ  جار ءَ  جناں ، رحمان ملک  سیاھیں  دروگ  بندیت۔ آئی  گوشتگ دُنیا  ءِ  ھچ وڑیں طاقت  منی  آزادی ءِ  لیکہ ءَ  بدل کُت  نہ کنت۔ قوم ءَ  اے  درچ ءَ یک دست ءُ یکجاہ  بیئگی اِنت۔ ما گوں دُنیا ءَ  دزبندی  کنیں  کہ  مئے  آزاتیں بستار ءَ بہ منیت۔ آئی ءَ گوشتگ رحمان ملک ءِ دروگاں ھچ  وزن نیست اَنچو کہ مرزا ءَ  گوشتگ، رحمان ملک  سکیں خطرناکیں  مردمے۔ پاکستان  دھشت  گردی ءِ بُنجاہیں۔  ھزاراں  بلوچانی قاتل ءَ  گوں ھچ  وڑا گپ  بیت  نہ کنت۔ بلوچ ءِ پجار ءِ رکینگ  ءُ بلوچستان ءِ آجوئی ءِ  ھاترا  جُھد برجاہ مانیت۔ بلوچ  گوں جوانیں  توجیل ءُ تکنیکاں وتی جنگ ءَ دیم  ءَ  برگ ءَ اِنت۔ بلوچ راجی آجوئی  ءِ جُھد ءَ  میان استمانی تکاں  باز جوانیں ھندی گپتگ۔ آئی ءَ گوشتگ مشرف ءِ زُلم ءُ  زوراکیاں  مئے لیکہ بدل  نہ کُتگ  رحمان ملک ءِ  دروگ  ھم مئے  لیکہ ءَ بدل  نہ کناں، یک  جُستے  پسہ ءَ آئی ءَ  گوشتگ  کہ پاکستان گوں وتی بدیں کِرداں اوغانسان ءَ قتل ءُ دھشت  گردیاں  ھواریں، عالمی دُنیا ءَ اے ھنداں امن ءُ ایمنی ءِ برجم دارگ ءِ ھاترا بلوچ ءِ تاریخی بستار منگ کپیت۔ دُنیا ءَ پہ پاکستانی ریاست ءِ دھشت گرد کردانی دارگ ءِ ھاترا بلوچ راجی جُنز کمک کنگ کپیت۔ آئی ءَ  گوشتگ لھتے کس درانڈیھ ءَ  نشتگ  ءُ صوبائی وتواکی گپ ءَ جنگ ءَ اَنت،  او این۔ پی  ءُ  بی۔ این۔ پی ءِ سیاست پاکستان ءِ پارلیمانی رھبندانی سرائیں۔  آ  انگت پاکستان ءِ پارلیمنٹ  ءِ سیاست ءَ  کنگ ءَ  اَنت۔ او مئے  لوٹ  مکمل  راجی  آجوئی اِنت۔ ما آزادی ءِ لوٹ ءَ چہ  پد نہ کِنزیں۔