لندن ' ھیر ءِ راستیں ھبر ءَ حاجی ءِ دروگ پاشک کرت

لندن [ پ ر ] گوستگیں روچاں ماں رسانکدراں پہ گوشگ ءَ  بلوچ آجوئی پسندیں گلانی  یک تکے ءِ  گوں پی پی ءِ اُستان کماش  حاجی لشکری رئیسانی ءَ گوں  گپ جنگ ءُ  نند ءُ نیاد کنگ ءِ پیشکش ءِ سر ءَ  ھیر بیار مری ءَ وتی ھیال درشان کرتگ ءُ گوشتگ کہ چَی پی پی ءِ دو تل ءُ دو پوستیاں ما جوانی ءَ سرپد اِیں ۔ دپتر گوش اِیت کہ ھروھدے آجوئی زرمبشانی تہ ءَ شدت اَتکگ ، زور گیریں فوج ءُ آھانی ادراھاں بلوچ آجوئی زرمبش ءَ ھمگرنچیں بلوچانی میان ءَ شک پاد کنگ  ءُ پہ میان اُستمانی تک ءِ مردم ءُ بلوچ راج ءِ گمراہ کنگ ءَ پندل کرتگ ۔ پاکستانی سرکار ءَ مدام چَہ رسانکدر ءِ کمک ءَ جھان ءُ بلوچ مھلوک ءَ  ھمے پیش دارگی کرتگ کہ بلوچ آجوئی لوٹوکیں گل سلاھاں دور دیگ ءَ اَنت کہ رند ءَ ایوک ءَ سرکار ءِ بے بنیں دروگ منتگ اَنت  ءُ بلوچ راج زرمبش ءِ تہ ءَ گیشی اَتکگ ۔ 2006ءَ چَہ شھید اکبر ءِ شھادت ءَ پیش بلوچ سرمچارانی سرکار ءِ تہ ءَ ھوار بوگ ءِ دروگیں ھال شنگ کرتگ آ وھدی چَہ سرکار ءِ  سلاھانی امبار ءَ  لھتیں سلاہ وتی ھَندی دلار انچوش کہ میر ھزار ءِ دوھزار کساس ءِ لیویز فورس ءِ دست ءَ دیگ بوتگ ءُ رسانکدراں ھمے پیش داشتگ کہ  بلوچ سلاھانی دور دیگ ءَ اَنت ۔ ملکی ءُ درملکی تک ءَ اے بلوچ آجوئی ءِ جنگ  ءَ نزور پیژدارگ ءِ یک جھدے اَت ۔ ھمے پیم جام یوسف ءُ انوں رئیسانی  ءَ ھم زر ءِ سر ءَ مردم بھازوتگ ءُ بلوچ مھلوک ءِ دلاں شک ودی کنگ لوٹ اِیت ۔ پاکستان بلوچانی چَہ بن ءَ دژمن اِنت یک انچیں دژمنے کہ  مئے راجی پجار ءَ چَہ گوستگیں شست ءُ چار سالیں پادانی چیر ءَ لتاران اِنت ۔ مئے گلزمین پہ زور دستیگ کرتگ ءُ بلوچ راجی مڈیاں وتیگ ءُ چَہ جھاد دزکپتگیں مڈی سرپد بیت ءُ گوں دوئیں دستاں پلگ ءَ اِنت آبلوچ دپتری بستار ءَ وتی پیرک مڈی سرپد اِنت ءُ  گوں دنیا ءَ سیادی پیم کنگ ءَاِنت ۔ جھان پاکستان ءَ چَہ بلوچستاں ءِ مڈیاں پجاکار اِیت ۔ما آھاں گوشگ لوٹ اِیں کہ بلوچستان ءُ بلوچ راجءَ گوں پاکستان ءِ نپ ءُ تاواناں ھوار مہ کن اَنت ما دپتر ءِ  بنچک ءَ یک جتائیں راج اِیں ءُ مئے یک گستائیں پجارے ۔ پاکستان  ءِ بدیں کارپد ءُ انتہاپسندی ءُ اپشالی جھان ءِ دیم ءَ پدر بوتگ اَنت ءُ  دنیا ءِ ایمنی ءِ تاوان دیگ ءِ سبب اَنت ۔ ما سرجمیں جھان ءَ چیر دست ءُ جبر آماچیں راجانی پہ آجوئی ءَ برجاھیں زرمبشانی گوں دل ءُ ھیال ءَ پلہ مرزی کن اِیں ءُ چَہ آھاں ھم ھمے  واھگ دار اِیں ۔ مارا بلوچستان ءِ آجوئی ءُ سلامتی چَہ  درساں دیم ءَ تر اِنت ۔ ھیر بیار مری ءَ  دیمتر ءَ گوشتگ کہ زور گیریں پاکستانی فوج ءِ گوں بلوچ راج ءَ چَہ دومان ءُ انسانی راھبنداں دریں کردگار کنگ ءَ ابید ھم آجوئی ءِ زرمبش ءِ تہ ءَ گیشی اے ھبر ءِ مانزمان اَنت کہ آجوئی ءِ زرمبش ءِ تہ ءَ ورناھاںی کساس ءِ گیش بوگ ءُ زرمبش ءِ ورناھانی سنچداریں جھد ءِ سبب ءَ سائنسی بنچک ءَ ایر بوتگ ۔ بلوچ سرمچار کہ آھاں بلوچ بیھداریں مھلوک ءِ مالی ، جانی ءُ  ستکیں پلہ مرزی گون اِنت ۔ پہ بلوچ گلزمین، بلوچ راج پجار ءُ سلامتی ءَ دژمن ءِ ھرچ رنگیں ءُ ناپاکیں پندلانی بے سوب کنگ ءِ واکدار اَنت ۔ بلوچ راج سرمچاراں بلوچ شھیدانی ھونانی بیر گر من اِیت ءُ چَہ دژمن ءِ ھرچ رنگیں پندلاں سرپد اِنت آ کسی شتلی ءِ چنگ ءَ  آیوک نہ اِنت ءُ نہ کہ لب ءُ ترس ءِ آماچ بیت ءُ چَہ وتی مولاں پد کنز بیت ۔ نوں یک رندے پدءَ گپ ءُ تران ءِ سبک ءُ وتگڑیں ھبراں کمک زورگ ءُ دژمن بلوچ راج آجوئی ءِ سر ءَ پابند ی جنگ ءَ بانزلک جنگ ءَ اِنت ۔ زور گیریں ریاست ءَ اے گوشگ لوٹ اِیں کہ داں بلوچ گلزمین ءِ سر ءَ زورگیرانی یک ھم سپاھی یے  ھست جھانی راھبند ءُ جنگی راھبندانی نہ منوگریں پاکستانی ریاست ءَ گوں گپ جنگ ءِ ھیال ھم کنگ نہ بیت ۔آئی ءَ گوشتگ کہ پاکستان ءُ آئی ءِ ادارہ   پہ بلوچ راج زرمبش ءَ جھانی تک ءَ رستگیں سوبمندی  ءُ وش اَتک  ءِ ھلاسی ءَ رسانکدرانی تہ ءَ وتی کاسگ چٹاں سپت وانینگ ءُ بلوچ راج ءِ میان ءَ رَد منی ودی کنگ ءَ اِنت ۔ بلوچ راج ءِ شھیدانی ندریگانی برورد ءَ مروچی زرمبش یک انچیں جاھے ءَ رستگ کہ ما بلوچ نپ گرگ ءُ پاکستان تاوان کنگ ءِ سیمسرءَ اِنت ۔ راج پہ آجوئی ءَ ھروھد مزنیں ندریگ دیگ ءَ ساڑی اِنت ۔ پہ گلزمین ءِ پھازگ ءِ سھرائیں کار آگوستگیں شست ءُ چار سال اِنت کہ کنان ءُ پیداک اِنت ۔ چَہ دوھزار ءَ بہ گر داں انیگ ءَ پاکستانی فوج ءَ چَہ بلوچستان ءِ توامیں دمگاں فوجی اُرش ءِ میان ءَ چاردہ ھزار ءَ گیش بلوچ آجوئی پسندیں ورنا ، کماش ، جنین ءُ چک آوار جتگ ءُ وتی کیمپانی تہ ءَ برتگ ۔ گوستگیں یک سالے ءِ کسانیں مدتے ءِ تہ ءَ آوار جتگیں بلوچانی چَہ دوسد ءُ پنجاہ ءَ برز میت بلوچاں دز کپتگ کہ گوں بیدردی ءَ سک شکنجہ داتگ ءُ شھید کنگ بوتگ اَنت ۔ ھیر بیار ءَ ابوغریب جیل ءِ درور داتگ ءُ گوشتگ کہ ابوغریب جیل ءَ  بندیگانی سر ءَ شکنجہ کنگ ءِ ھال ءِ شنگ بوگ ءَ پد جھان ءَ شور مچ اِتگ کہ بلوچانی سر ءَ پاکستانی جبر ءِ دیم ءَ گوں زھگاں گوازی کنگ ءِ بستار بوتگ ۔ پاکستانی شکنجہ جاھانی تہ ءَ بلوچانی بالاد ڈرل کنگ بنت ، آھانی بالاد داگ دیگ ءُ پاکستان زندہ باد نوشتگ کنگ بیت ۔ چپگان درنجگ ، دست ءُ پادانی پروشگ ، زندوکائی بن دیگ گونگیں بدتریں انسانیت سوچیں شکنجھانی سر ءَ جھانی تک ءِ مردمانی بے تواری وتی جوڑ کرتگیں راھبندانی سر ءَ گامگیج نہ زورگ  بازیں جست ودی کنگ ءَ اِنت ۔ میان اُستمانی ءُ دگہ جھانی گلانی پاکستان ءِ بے دودیں کارپدانی سر ءَ ھاموشی پہ سرجمیں انسانیت ءَ یک پگرمند ی ءِ ادار اِنت ۔ ھیر بیار ءَ گوشتگ کہ زورگیریں ریاست سنچداریں آجوئی ءِ زرمبش ءُ بلوچ ورناھانی سوبمندی ءَ سک باز پریشان ءُ بے تاھیر اِنت ءُ پہ بلوچ زرمبش ءِ ایرموشی ءَ پرایمنیں رنگے ءَ جھد کنوکیں ورناھاں آوار جنگ ءَ پد آھانی چلینتگ ءُ شرینتگیں میتاں دور دیگ ءَ اِنت ۔اگاں پد ءَ ھم کسے سرپد بیت کہ گوں اے ریاست ءَ چَہ آجوئی ءَ کمتریں ڈک ءِ سر ءَ نندگ ءُ گپ بیت بزاں کہ بے سدانی جنت منند اِنت ۔