پہ ھندوستان ءِ انگیر کنگ ءَ چَہ پاکستان ءِ کمک ءَ چینی سپاھیگ ھندوستانی سیمسراں نشتگ اَنت ' ھندوستانی آرمی چیف

نئی دلی : چَہ پاکستان ءِ شتلی ءُ چین ءِ لالچ ءَ پاکستان ، ھندوستان ءُ چین ءِ فوجی یک دومی ءِ دیم پہ دیم اُوشتارینتگ اَنت ۔ ھندوستان ءِ ھالرسانکانی رد ءَ ھندوستانی فوج ءَ پاکستان ءِ چیردستیں کشمیر ءِ تہ ءَ چین ءِ گیش بیوکیں سرگرمی ، لداخ ءَ چَہ چینی فوج ءِ نیمگ ءَ ھندوستانی فوج ءِ 17بنکرانی تپاہ کنگ ءُ کنٹرول لائن ءِ سر ءَ چینی فوج ءِ نندگ ءِ سر ءَ بے تاھیری درشانتگ ۔اے درگت ءَ آرمی چیف جنرل وی کے سنگھ ءَ گوں سر وزیر ڈاکٹر من موھن سنگھ ءَ  گند ءُ نند کرتگ ءُ سئے نکتھی سوج دیم ءَ ایرکرتگ ۔ سوجانی تہ ءَ کوہ ءُ بالادی دمگاں فوجی دستہ نندارینگ ، پہ فوج ءَ گستا ٹرانسپورٹ ءُ سیمسری ھنداں دگ ءُ دگہ آسراتیانی گیش کنگ ھوار اَنت ۔ آئی ءَ پاکستان ءِ چیردستیں کشمیر ءِ تہ ءَ چین  ءِ سرگرمیانی درگت ءَ من موھن سنگھ ءَ بریفنگ داتگ ءُ گوشتگ کہ پاکستان ءَ چین کشمیر ءِ تہ ءَ پترگ ءِ اجازت داتگ چینی فوج گلگت بلتستان ءِ پجیگ ءَ پاکستان  ءِ دگہ گوریچانی دمگاں ھم پتر تگ ۔ شوربندی ءِ رد ءَ پاکستانی فوج نوکتریں ساز ءُ ساماں ءَ گوں ساڑی بیت ۔ کنٹرول لائن ءِ دومی نیمگ ءَ چینی فوج ءِ سرگرمی بے تاھیری ءُ پگرمند کنوک اَنت پہ ایشانی دارگ ءَ ھواریں سوج ءُ سوڈگ لوٹ اِیت ۔ آئی ءَ گوں سر وزیر ءَ وتی پیش کرتگیں سوجانی سر ءَ زوت گامگیج زورگ ءِ دزبندی کرتگ داں چوناھیں ھم نہ گیگیں جاورانی دیمپانی ءَ فوج ءَ زنڈیں تاوان مہ رس اِیت ۔ آئی ءَ گوشتگ کہ پاکستان ءِ سیمسراں وتی سپاھیگ شیوار کرتگ اَنت ءُ آ ھرچ رنگیں جاورانی دیمپانی ءَ ساڑی اَنت ۔ آئی ءَ اے ھبر ھم گوشتگ کہ لائن آف ایکچیول کنٹرول ءِ سر ءَ چینی فوج ءَ وتی پوزیشن مھکم کرتگ چینی سرکار پہ وتی فوج ءِ مھکم کنگ ءَ بازیں دیمروی کرتگیں گامگیج چست کرتگ ۔ھندوستانی میڈیا ءِ گوشگ اِنت کہ پہ سوجانی سر ءَ کار کنگ ءَ دوازدہ ھزار کروڑ ھندوستانی روپیہ ھرچ بیت ۔ زانگ لوٹ اِیت کہ اے وھدی ھندوستان فوج ءِ انچیں دو ڈویژن  سیمسراں نشتگ کہ ماں کوھی دمگاں گوں دژمن ءَ مڑگ ءُ زرباررودرتکی ریاستانی تہ ءَ نکسل یاگی ءَ گوں دیم بوگ ءَ نندارینگ بوتگ اَنت ۔ بیست ءُ یک اگست ءَ لداخ ءِ ھنکین لھہ ءَ کنٹرول لائن ءِ نزیک ءَ جوڑ کرتگیں چمر نامیں کوچگ ءَ چینی فوج ءِ دو ھیلی کاپٹراں ھندوستان ءِ 17بنکر تباہ کرتگ ءُ اے درگت ءَ ھنکین ءِ دیمروی ءِ کمشنر ٹی انکچک ءَ ریاستی بندبست نوشتگیں رنگے ءَ ھال کرتگ ۔