بلوچستان یونیورسٹی ءِ مالی جنجال دور کنگ بہ بنت ' بلوچ اسٹوڈنٹس ایکشن کمیٹی

شال : بلوچ اسٹوڈنٹس ایکشن کمیٹی ءَ پہ بلوچستان یونیورسٹی ءِ مالی جنجالانی دور کنگ ءَ بلوچستان ءِ پاکستان چیر دستیں سرکار ءِ سر ءَ زور داتگ کہ اے جاورانی سبب ءَ یونیورسٹی ءِ بند بوگ ءُ اُستاد ءُ دگہ کارکنوکانی  مز ءِ دیگ ھم جیڑھے جوڑ بیت ۔ ایکشن کمیٹی ءَ وتی پہ ھالتاکاں شنگ کرتگیں بیان ءِ تہ ءَ گوشتگ کہ بلوچستان نہ ایوک ءَ سرجمیں پاکستان ءَ چَہ مزنیں مدتے ءَ گیس  دیگ ءَ اِنت بلکیں چَہ ایشی ءَ ابید دراجیں تیاب ءِ ھم واھند اِنت ۔ ایٹمی تراک ھم بلوچستان ءِ تہ ءَ کنگ بوتگ ، یورنیم ، سھر ءُ گلیٹ ءِ مڈی ھم سیندک ءُ ریکو ڈک ءِ بلوچ سرزمین ءَ اَنت ۔ اسٹرٹیجک بستار ءَ ھم بلوچ سرزمین چَہ دمگ ءِ دگہ زمیناں گیشتر ارزش دار اِیت ۔اگاں اسلام آباد ءَ اے وسیلہ ءِ تہ ءَ دہ درسد ھم بلوچستانءَھرچ بہ کرت اِنت بلوچستان یک ھم ناوانندہ ، بے روزگار ءُ نیزگار ے پشت نہ کپتگ اَت ۔ پمیشکا کہ ھمینچک مڈی بلوچستان ءِ گور ءَ ھست   اینچک دبئی ءُ دگہ ملکانی گور ءَ ھم نیست بلے مروچی جاور اِیش اِنت کہ بلوچستان ءِ چَہ درساں مستریں وانجاہ مالی جنجالاں دوچار اِنت ۔ دگہ یک بیانے ءِ تہ ءَ ایکشن کمیٹی ءَ بولان میڈیکل کالج ءِ کوھنیں ایسوسیٹ پروفیسر سرجن ڈاکٹر ایاز مندوخیل ءِ بیرانی ءِ سر ءَ ھم دلپدردی درشان کرتگ ءُ گوشتگ کہ ھدامرزی یک مزنیں آُستادے اَت آئی ءِ کارکرد ءُ کارپد مدام یات کنگ بنت ۔