فلپائن: فوج ءَ ”امن روچ” ءِ درگت ءَ کمیونسٹ یاگیانی ھلاپ ءَ یک روچی جنگ بندی ءِ جار جتگ۔

فلپائن:  فلپائنی فوج ءَ مرچی ”یو این او” ءِ نیمگ ءَ عالمی ”امن روچ” ءِ دارگ ءِ درگت ءَ کمیونسٹ یاگیانی ھلاپ ءَ یک روچی جنگ بندی ءِ جار جتگ۔ ھالانی رِدا کرنل آرنلفو بر گوس ءَ گوشتگ فوج عالمی امن روچ ءِ درگت ءَ سئے شنبہ ءِ شپ ءَ تاں چار شنبہ ءِ شپ ءَ کمیونسٹ یاگیانی ”پیپلز ارمی” ھلاپ ءَ ھِچ وڑیں جنگ ءُ چوپ نہ کنت۔ پیپلز آرمی فلپائن ءِ ماؤنسٹانی سلاہ بندیں گَلے۔ پیپلز آرمی نیمگ ءَ اے پژگِرد ءَ ھِچ وڑیں  پَسّہ دیم ءَ  نیَتکگ۔ فلپائنی سرکار ءُ یاگیانی میان ءَ گپ ءُ تران ایوکیں ھپتگ ءَ مان ناروے بّنگیج بیئگ اِنت۔  یاگی ءُ فلپائنی سرکار ءِ میان ءَ جنگ ءُ چوپاں گوستگیں چِل سالاں دو لکھ ءُ پنجاہ ھزار مردم بیران بیتگاں۔ دومی نیمگ ءَ فلپائنی مسلمانانی سلاہ بندیں گل ”مورو اسلامک لبریشن فرنٹ” ءُ سرکار ءِ میان ءَ گپ ءُ تران ھم جاری اِنت۔  مورو اسلامک لبریشن فرنٹ ءَ سرکار ءِ نیمگ ءَ صوبائی وت واکی ءِ رسگ ءِ پژگرد ءَ آزادی یے لوٹ ءَ دزکش بیئگ ءِ جار جتگ۔