گوریلہ جنگ۔۔۔حکمت عملی

بام: گوریلہ جنگ ءِ کِسہے دراجیں۔ گوریلہ جنگ ھما وھد ءَ کنگ بیت کہ دیم ءِ دُشمن باز مُھکم بہ بیت۔ سلاہ ءُ افرادی قوت ءِ حوالہ ءَ دُشمن مضبوط تر بہ بیت تہ دشمن ءِ پروش دیگ ءِ ھاترا گوریلہ حکمت عملی کارمرزگ بنت۔ اے ردا جھان ءِ بازیں ھند ءُ دمگاں زوراکیں دُژمن ءِ پروش دیگ ءِ ھاترا چیریں جنگ بزاں گوریلہ حکمت عملی کارمرزگ بیتگ اَنت۔ گوریلہ جنگ ءِ تھا بائد سپاہیان ءَ ذھنی ءُ تکنیکی حوالہ ءَ ھمے وڑا مھکم ءُ مضبوط کنگ بہ بیت کہ گوریلہ چہ مرگ ءِ تُرس ءَ وتی سرجمیں رازاں مہ ریچیت ءُ سنگتانی ھالاں مہ دنت۔۔راستی اِش اِنت کہ گوریلہ سپاہی ءِ مستریں ہتھیار رازداری ءُ ذھنی مُھکمی اِنت۔۔ اگاں ناں دومی حوالہاں گُڑا دُشمن گیشتر مُھکم تر اِنت۔۔

گوریلہ راجدپتر ءِ بابت ءَ بازیں حوالہ است اَنت۔۔ گُشنت یازدھمی صدی ءَ مسلمانانی عباسی حاکمانی ھلاپ ءَ حسن بن سباہ ءَ گوریلہ حکمت عملی کارمرز کُتگ۔ آئی ءَ کُردستان ءِ ”بہشتی کوھاں” کیمپ جتگ ءُ عباسی شاہ ءُ حاکمانی ھلاپ ءَ گوریلہ جنگ کُتگ۔ تاریخ ءِ تھا اے اولی ”چھاپہ مار” جنگ اِنت کہ گوریلہ حکمت عملیانی بنیاد ءَ بیتگ۔۔ شادھمی صدی بلوچیں بامرد ”بالاچ گورگیج” ءَ ھم گوریلہ حکمت عملی کارمرز کتگ ءُ عھد ءِ زوراک پروش داتگ۔ بالاچ ءِ جنگی رھبند ھم سائنسی بنیاد ءَ بیتگ اَنت۔۔

بلے اے درگت ءَ میان اولی میان استمانی رھشون واجہ ڈاکٹر چے گویرا بیتگ کہ آئی ءَ اے جنگ ءَ را سائنسی بنیاد داتگ۔ پمیشا نوکیں گوریلہ جنگ ءِ مستریں سِمبل ما چے گویرا ءَ گُشیں کہ آئی ءَ سائنسی بنیادانی کارمرزگ ءَ بازیں میداناں دُشمن ءَ پروش داتگ۔ چے گویرا ءِ لھتے صفت کہ چرایشانی سوب ءَ آئی ءَ سوب مندی رَستگ، ایش اَنت کہ ڈاکٹر چے گُشیت کہ ” تاں کیوبا ءِ آزادی ءِ روچ ءَ من فیڈل کاسترو ءِ سرا شک داشتگ کہ آ بلکیں سی۔آئی۔اے ءِ ایجنٹے” چیاکہ فیڈل جنگ ءِ اولسرا امریکی حاکمانی زندان ءَ بیتگ۔ بلے مئے گورا چوش نہ اِنت ءُ ناکہ مئے جنگ ءَ را گوریلہ جنگ گُشگ بیت۔ بلکیں مئے جنگ نیم روایتی جنگے۔۔۔۔۔۔مردمانی تَگ ءُ گیچن ءُ چار ءُ تپاس سائنسی رھبندانی سرا نہ بیت۔۔

چے گویرا ءَ گوں نوکیں حکمت عملیاں، کمے کسانی ھمراھی ءَ بازیں میداناں سوب مندی رستگ۔ آئی ءِ سوب مندی سلاہ نہ بیتگ۔ بلکیں گوریلہ حکمت عملی بیتگ اَنت۔ بلے چے گویرا کیوبن انقلاب ءَ پد جھان ءِ بازیں مُلکانی تر ءُ گرد ءَ کنت ءُ بازیں مراگشاں گُشتانک دنت کہ آ ملکاں چین، مصر ءُ دگہ مُلک ھوار اَنت۔۔بلے بولیویا ءِ روگ ءَ پیش آ مصر ءَ کئیت ءُ پدا ھمے سوڑگ ءَ کنت کہ من بولیویا ءَ جنگ ءَ رواں۔ تہ محمد نامیں مردکے کہ آ وت گوریلہ جنگ ءِ ٹوھیں استادی بیت چے گویرا ءَ مہ کن کنت کہ بولیویا ءَ اگاں رویے تہ سوب مند نہ بئے۔ مصر ءِ جمال ناصر ھم آئی ءِ بولیویا ءَ روگ ءَ تپاک نہ کنت۔

محمد ءِ مکن کنگ ءِ مستریں سوب ایش بوتگ کہ چے گویرا ماں بولیویا ءَ پمیشا سوب مند نہ بیت کہ آئی ءَ کیوبن محاذ ءِ کَٹگ ءَ پد بازیں مراگشاں جنگی حکمت عملیانی بابت ءَ گُشتانک داتگ ءُ وتی سوب مندی بیان کُتگ اَنت۔ پمیشا سی۔آئی۔اے  چرآئی ءِ گُشتانکاں چہ آئی ءَ سوب مند بیئگ ءِ بازیں درچاں نپ چِست کُت کنت۔۔۔ بلے چے گویرا تمرد ءُ بھادریں انسانی بیتگ ءُ شھیدی ءِ ھم شوق۔۔۔۔۔

1967 ءَ ڈاکٹر چے ءَ سی۔آئی۔اے گوں جرمن جاسوس ”ھینز گاڈرین” ءِ کمک ءَ دزگیر کنت۔ ھینز گاڈرین سکیں مکاریں مردے بیتگ کہ آ ھٹلر ءِ دورا ماں جرمنی ءَ پولیس آفیسرے بیتگ۔ گُشنت کہ ھٹلر ءِ بازیں سوب مندی ھم چہ ھینس گاڈرین ءِ حکمت عملیانی سوب ءَ بیتگ اَنت۔ گُشنت ءُ استاد محمد ءِ گپ راست ثابت بیتگ ءُ ڈاکٹر چے  ھینس گاڈرین ءَ آئی ءِ ماں مراگشاں داتگیں گُشتانک ءُ لیکچرانی کمک ءَ دزگیر کُتگ۔۔ بزاں آئی ءَ چہ ھما داتگیں لکچراں کمک زُرتگ ءُ ڈاکٹر ءِ حکمت عملیانی پروش دیگ ءَ سوب مند بیتگ ءُ چر ایشی ءَ ڈاکٹر چے دزگیر کنگ بوتگ ءُ پدا شھید کنگ بیتگ۔۔