کلانچ : بیلار ءَ زورگرانی بیڑ ، بازیں مردم آوار جتگ اِش

پسنی : پسنی ءِ ھنکین کلانچ ءَ زورگریں ایف سی ءِ لشکریاں  مروچی سھب ءَ بیڑ بُرتگ ۔ بازار ءِ  بازیں مردمانی لوگاں پُترتگ اَنت ۔ گرانھریں سامان پُروشتگ ءُ سھر ءُ زر دز اِتگ ءُ مردم آوار جتگ اَنت ۔

پسنی ھال نامیں پَیس بک تاکے ءِ رِد ءَ چَہ بیلار ءَ حاجی پیروز ءِ دو چک '' امیر '' ءُ '' موسی '' ، محمد ءِ چک '' صابر '' ءُ عبدالرحمن ءِ چک '' رشید '' زورگراں آوار جتگ اَنت ۔

بام ھال ءِ اھوالکار ءَ اے رِد ءَ گْوشتگ کہ کلانچی مردمانی گْوشگ اِنت  زورگریں ایف سی ءَ چَہ کلانچ ءَ '' یونس کلانچی '' نامیں مردمے ءِ پجیگ ءَ دگہ لھتے مردم آوار جتگ ۔

اھوالکار ءِ گْوشگ اِنت چَہ بیلار بیڑ ءَ پد ایف سی ءِ کاروان گوادر ءِ نیمگ ءَ اَتکگ ءُ گمان ھمیش اِنت کہ آوار جتگیں مردم  ایف سی کیمپ گوادر ءَ آرگ بوتگ اَنت ۔