محمود شاھردوی ایرانی مجلس ء خبرگان ءِ ادارکی مستر بوت

محمود ھاشمی شاھردوی ماں ایران ءَ پہ ادارکی '' مجلس ء خبرگان ء رھبری '' ءِ سروک  بوت۔

ھاشمی شاھردوی '' مجلس ء خبرگان ء رھبری '' ءِ اول کمک سروک اِنت ءُ محمد رضا مھدوی کنی ءِ نادارھی ءِ سبب ءَ کہ اے وھدی پہ '' مژگی نادراھی '' ءَ نادراھجاہ ءَ اِنت ، آئی ءِ جاہ ءَ کار کنت ۔

مجلس ء خبرگان ءِ باسک  احمد خاتمی ءَ چھار شمبے ءِ روچ ءَ مجلس ءِ دیوان ءَ گْوشتگ کہ راھبندانی پد ءَ اگاں خبرگان ءِ باسکے دزکشی بہ کنت یا چَہ دنیا ءَ بروت ، چَہ آئی ءَ پد مجلس ء خبرگان ءِ اولی دیوان ءَ آئی ءِ بدل گچین کنگ بیت بلئے داں وھدے کہ مھدوی کنی ءِ جاندراھی ءِ درگت ءَ زانگ نہ بیت ، مجلس ءِ  اول کمک سروک آئی ءِ جاہ ءَ کار کنت ۔

محمودھاشمی شاھردوی ایران ءِ مزن آمیدگس ءِ پیشگیں مستر ، اکبرھاشمی رفسنجانی ءُ محمد یزدی  چَہ ھما گچینیں سراں ھوار اَنت کہ مجلس ء خبرگان ءِ مستر بوت کن اَنت ۔

سئے سال پیش چَہ اکبر ھاشمی رفسنجانی ءَ اے اُگدہ محمد رضا مھدوی کنی ءَ رستگ ءُ آئی ءَ رھبر ءِ منوگرانی پلہ مرزی گون اَت ۔ ھاشمی کہ آ وھدی رھبر ءِ پلہ مرزانی تْرندیں ایراد گری اَت پہ مجلس ء خبرگان ءَ نامزد نہ بوت ۔

مجلسء خبرگان ءِ باسک نامی ئیں ملا ءُ مذھبی زانوگر اَنت کہ آ  ھشت سال ءِ سر ءَ چَہ مردمانی ووٹاں گچین بنت ۔ مجلس ء خبرگان ایرانی رھبر ءَ گچین کنت ۔

حسینعلی منتظری ءِ '' جھگیررھبر'' ءُ آیت اللہ خامنہ ای '' رھبر'' گچین کنگ مجلس ء خبرگان ءِ مزنیں کار اَنت ۔