تحفظ پاکستان آرڈیننس سیاھیں راھبندے کہ بلوچانی کُشندھاں واکمند کنت' نصراللہ

شال : وائس فار مسنگ پرسنز ءِ چیئرمین نصراللہ بلوچ ءَ گْوشتگ کہ '' تحفظ پاکستان آرڈیننس بل '' ءِ مول بلوچستان ءَ پہ زور بیگواہ کُرتگیں مردمانی کیسانی بے اثر کنگ ءُ وتی کارپداں چَہ مزن آمیدگساں چیردیگ اِنت ۔اپوزیشن ءَ نشتگیں پارٹی پہ وتی سوتاں تحفظ پاکستان آرڈیننس ءِ درگت ءَ تُرک ءُ نک اَنت ۔ اے سیاھیں راھبند انسانی حقانی لگتمالی اِنت ۔آئی ءَ گوں '' آن لائن '' ءَ گپ جنان ءَ گْوشتگ کہ بلوچستان ءَ چَہ راھبند در دزگیری ءُ بیگواھی ءِ کاریکشل ءَ برجاہ اَنت ءُ ایشانی تہ ءَ ھچ رنگیں کمی نہ آیگ ءَ اِنت ءُ بلے کہ تحفظ پاکستان ءِ نام دیگ بوتگ اے سیاھیں راھبندے ۔
ھما ادارھانی سر ءَ مردمانی چَہ راھبند ءَ در دزگیری ، بیگواہ کنگ  ءُ لٹ کٹ کُرتگیں میتانی دور دیگ ءِ ملام اَنت چَہ اے راھبند ءِ منگ ءِ مراد آھاں چد ءُ گیش ءُ بے کساس واک دیگ اِنت داں آ گوں ھرچ شھرمنندے ءَ ھرچے بہ کن اَنت آھاں جست کنوک مہ بیت ۔
اے راھبند ءِ مننگ ءَ پد بیگواھیں مردمانی جیڑہ گیشتر بیت ءُ ابید چَہ مھکم ءُ راستیں ملامداری ءَ بے میاریں مردمانی آوار جنگ ، دراجیں مدتے ءَ ابید چَہ میار ءَ زندانی کنگ ، لٹ کٹ کنگ ءُ مردمانی کشگ ءِ راھبندی راہ رس اِیت کہ سکیں ترسناک ءُ تاواندئے اِنت ۔
آئی ءَ گْوشتگ کہ اپوزیشن پارٹی ءَ ھم انسانی زندگیانی جیڑہ ءِ درگت سنگینی پیش نہ داشتگ ءُ اے سیاھیں راھبند ءِ بگیری ءِ جاہ ءَ پہ سوتانی پھریزگ ءَ چم ءُ دپ بستگ اَنت کہ ھمینکس ایرجنگ بہ بیت کم اِنت ۔