دشت ءِ وئیل بلوچ دُژمن سرکار ءِ پندلے، جمیل بگٹی

بام: بلوچ رھشون واجہ جمیل بگٹی ءَ مستونگ ءِ دمگ دشت ءَ بے گُناھیں پٹھانانی کوش ءَ ایر جنان ءَ گُشتگ کہ چُشیں عمل بلوچ دُژمنانی پندلے، تاکہ آ یو۔این۔او ءِ ورکنگ گروپ ءَ ھمے نشوندھی ءَ بِدینت کہ بلوچستان ءِ جاورھال باز ھراب اَنت۔ 

جمیل بگٹی ءَ گُشتگ کہ یو۔این۔او ءِ گار ءُ بیگواھیں مردمانی درگت ءَ پٹ ءُ پول کنوکیں ٹیم ءِ دیمگیری ءِ ھاترا بلوچ دُژمن اسٹبلشمنٹ چُشیں عملاں کنگ اِنت۔ بلوچ دُژمن چُشیں کردانی پُژگرد ءَ بلوچ ءِ نام ءَ بدنام کنگ ءُ یو۔این۔او ءِ تر ءُ تابی ٹیم ءَ محدود کنگ لوٹیت، دانکہ آ بلوچ ھند ءُ دمگاں گار ءُ بیگواھیں مردمانی بابت ءَ وتی پٹ ءُ پول ءَ مھتل بداریت۔ 

جمیل بگٹی ءَ چہ گوں بلوچ ءُ پشتون راجاں دزبندی کُتگ کہ آ دُژمن ءِ چشیں پندلاں پدر بہ کن اَنت ءُ دوئیں راج گوں یکمشت ءُ تپاکی ءَ دُژمن ءِ چُشیں پندلانی دیمگیری ءَ بہ کناں۔