ایردستیں بلوچستان ءِ دمگ پسنی ءَ پاکی اسلامی فوج ءِ بُنجل ءَ دزگیریں بلوچ ورناھانی دردناکیں نالگ ءُ زاری اِش کنگ بوتگ اَنت

بام: اسلامی وتگڑیں استان  پاکستان ءِ ایردستیں بلوچستان ءَ پاکستانی اسلامی لشکر ءِ دست ءَ ھزاراں بلوچ ورناہ، کماش، زھگ ءُ زالبول آوار جنگ بوتگ اَنت۔ بلوچ ورناھانی گَل ”بی۔ایس۔او (آزاد) ءِ سنگتانی یو۔این۔او ءِ ورکنگ گروپ ءِ سرا دیم داتگیں نمدی ءِ ردا ماں بلوچستان ءَ پاکستانی اسلامی لشکر ءِ دست ءَ آوار جتگ ءُ گار ءُ بیگواھیں مردمانی کَچ چاردہ ھزار ءَ چہ گیش بیت۔

 پاکستانی اسلامی لشکر ءَ بازیں بیگواھیں بلوچ ورناہ، کماش، زھگ ءُ زالبول شھید کُتگ اَنت ءُ آھانی ٹپ ءُ ٹوریں لاش ماں دَگ ءُ چاھراھانی سرا چگل داتگ اَنت۔ پاکستان ءِ نام گیپتیں اسلامی رستریں لشکر ءِ دست ءَ شھید بوتگیں ورناہ، بلوچ سیاسی کارِندہ، ندکار ءُ دانشورانی کَچ شش صد ءَ چہ بُزر بیت۔ اے کَچ ھما شھید بوتگیں بلوچانی اِنت کہ آ اسلامی رستریں لشکر ءِ دست ءَ آوار جنگ بوتگ اَنت ءُ بازیں ٹارچر ءُ تکلیف ءَ پَد آ شھید کنگ بوتگ اَنت ءُ آھانی ٹپ ءُ ٹوریں لاش ماں ویراناں چَگل دیگ بوتگ اَنت۔ راستی ایش اِنت پاکستانی لشکر ءِ دست ءَ شھید بوتگیں لس بلوچانی کَچ ھزارانی حساب ءَ سَر بیت۔ اے گَپ چہ کَس ءَ چیر نہ اِنت کہ اے اسلامی لشکر ءَ ھما بلوچ ورناہ ءُ کماش کہ آوار جتگ ءُ بیگواہ کُتگ اَنت، آھان ءَ وڑ وڑیں غیر انسانی ”ٹارچر“ ءُ تکلیف دیگ ءَ پَد شھید کُتگ ءُ آھانی ٹَپ ءُ ٹوریں لاش بلوچ ءَ سوغات دیگ بوتگ اَنت۔ 

ھندی ھالانی ردا ماں ایدستیں بلوچستان ءِ تیابی شھر پسنی ءِ دمگ ”ماکولہ“ ءَ یک انچیں فوجی بُنجلے ءِ نشوندھی کنگ بوتگ کہ اودا شپ ءِ وھد ءَ دزگیریں بلوچ ورناھانی دردناک ءُ دِلتراکیں توار اِش کنگ بوتگ اَنت۔ ماکولہ ءَ یک ”بیسے“ کہ اے تیابی دگ ءِ جوڑ کنگ ءِ وھد ءَ ”ایف۔ڈبلیو۔اے“ ءِ کمپنی ءَ کاردارانی ھاترا جوڑ کُتگ۔ دگ ءِ جوڑ کنگ ءَ پد اے ”بیس“ پاکی رستریں لشکر ءِ دست ءَ دیگ بیتگ۔ ماکولہ فوجی بُنجل ءِ نزیک ءَ یک ھوٹلے کہ شپ ءِ وھد ءَ کراچی ءَ رؤکیں ”بس“ ھمدا دارَنت۔ مسافرانی نشون ءِ پدا شپ ءِ وھد ءَ ماں بیس ءَ انچیں دردناک ءُ دلتراکیں انسانی نارگ ءُ اوپارگانی توار اِش کنگ بوتگ کہ چَرایشی ءَ ھمے نشون رسیت کہ پاکی رستریں لشکر ءِ دست ءَ آوار جتگیں بلوچ ورناھاں ھمے بیس ءِ تھا  غیر انسانی ٹارچر کنگ بیت ءُ شھید کنگ بنت۔ 

کوئٹہ ءَ سیادی دورکیں مسافرے ءِ ردا آئی ءَ ماں لشکر ءِ بُنجل ءِ تھا لھتے انچیں دردناک ءُ دلتراکیں آواز اِش کُتگ کہ چوشیں دلتراکیں توار زندگی ءَ اولی رند ءَ منی گوشاں کَپتگ ءُ اے دردناکیں توار منی سَگ ءُ اوپار ءَ  ڈَن بوتگ اَنت کہ چر اے دلتراکیں آوازانی اِش کنگ ءَ من ءَ تَپ ءَ گور جَتگ۔ چر ایشی ءَ چہ ھمے سرپدی رسیت کہ ماں کیچ گوادر ءَ آوار جتگ ءُ بیگواہ کُتگیں بلوچاں ھمے ”بیس“ ءِ تھا غیر انسانی ءُ غیر اخلاقی ءُ غیر اسلامی ٹارچر ءُ تکلیف دیگ بیت ءُ رندا آھان ءَ شھید کنگ بیت۔

بلوچ ءَ جیڑگ لوٹیت کہ چوشیں دردناکیں تکلیفانی آماچیں ورناھانی توار ءَ چہ یک مردمے تپ ءِ آماچ بہ بیت۔ تہ پہ مات ھاک ءِ  آجوئی ءِ ھاترا آوار جتگ ءُ بیگواہ بوتگیں بلوچ ورناہ ءُ کماش گوں چونیں تکلیف ءُ غیر انسانی ٹارچر ءَ دوچار اَنت۔ مئے دل ترک ایت۔ درست چہ رَب ءَ دعا بہ کن یے کہ خدا پاکستان ءَ گوں رستری کارپداں تباہ ءُ برباد کنات ءُ مئے برات چہ اے تکلیف ءُ جنجالاں آجو بات اَنت ءُ بلوچستان آجو بات۔ خدا راجی غداراں ماں زندگی ءَ نشان کنات۔