گوگل کمپنی ءَ امریکی سرکار ءِ دزبندی رَد کْتگ

بام: چاگردی کُڈک ”گوگل کمپنی“ ءَ اسلام ءِ ھلاپ ءَ جوڑ بوتگیں تامُر ءِ ماں وتی کُڈک ءَ کور کنگ ءِ بابت ءَ امریکی سرکار ءِ دزبندی رَد کُتگ۔ دَرمُلکی رسانکی ھالانی رِدا ”وائٹ ھاؤس“ ءَ چہ گوگل کمپنی ءِ کارمستراں دزبندی دیم داتگ کہ آ اسلام ءِ ھلاپ ءَ مصری عیسائی ”ٹیری جونز“ (Tarry Jones) ءِ سروکے ءَ جوڑ بیتگیں تامُر ءِ پیت بنداں چہ وتی کُڈک ءَ کور بہ کنت۔ گوگل کمپنی ءَ امریکی سرکار ءِ دزبندی رَد کنان ءَ گُشتگ کہ تامُر ءِ ماں مئے کُڈک ءَ ایر گیجگ ھچ وڑا مئے کُڈک ءِ بنکی رھبندانی ھلاپ نہ اِنت۔ تامر ءِ پیت بند ھچ وڑا چہ کُڈک ءَ کور کنگ نہ بنت۔ کمپنی ءَ گُشتگ ماں لیبیا ءُ مصر ءَ امریکی سفارتی کارگس ءِ سرا اُرش ءَ پد انڈونشیا ءُ انڈیا ءَ ھم پیت بند (ویڈیو) ”سنسر“ کنگ بوئگ اِنت۔ وھدیکہ امریکا ءَ  اسلام ءِ ھلاپ ءَ تامر ءِ جوڑ کنگ ءِ پژدر ءَ مصری عیسائی ”ٹیری جونز“ ءِ ھلاپ ءَ  پَٹ ءُ پول ءِ حکم داتگ۔ تامر ءِ سروک ءَ 2010 ءَ ”بینگ فراڈ“ ءِ کیس ءَ ماں امریکا ءَ سزا دیگ بوتگ۔ ”ٹیری جونز گروپ“ ءَ اسلام ءِ ھلاپ ءَ تامرے ٹھینتگ کہ چرایشی ءِ سوب ءَ جھان ءِ سرجمیں مسلمان دلرنج اَنت۔ بلے پہ راستی بچاریے ، اے تامر ایوک  اسلام ءُ پاکیں نبی (ص) ءِ شان ءُ شرپ ءِ ھلاپ ءَ گُستاخی ئے نہ اِنت۔ بلکیں عرب راجدپتر ءُ بنکی کلچر ءِ سرا مزنیں اُرشے۔