سرکاری گل ءِ نیمگ ءَ مئے باسکاں بیھار دیگ بئیگ اِنت۔ رھشون وائس فار بلوچ مسنگ فرسنز

بام : وائس فار بلوچ مسنگ فرسنز ءِ چیئر مین واجہ نصراللہ بلوچ ءُ وائس چئیرمین ماما قدیر بلوچ ءَ وتی رسانکی ھاتران ءَ گُشتگ کہ سرکاری نامداتیں گِل ”نفاذ امن بلوچستان “ ءِ نیمگ ءَ گل ءِ باسکان ءَ بیھار رسگ اِنت۔ آھاں گُشتگ نفاذ امن بلوچستان سرکاری گلے ءُ ما اے گپ ءَ سرپد اِنت کہ اے گَل آئی۔ایس۔آئی ءُ ایم آئی ءِ زبان ءَ گپ جَنت۔

وائس فار بلوچ مسنگ فرسنز ءِ رھشوناں تران کنان ءَ گُشتگ کہ یو۔این۔او ءِ ورکنگ گروپ ءَ گند ءُ نند ءُ بلوچستان ءِ گار ءُ بیگواھیں مردمانی بابت ءَ سرجمیں راستیانی پیشدارگ ءَ پد مئے باسکان ءَ سرکاری گل ءِ نیمگ ءَ بیھار رسگ اِنت۔ آیاں گُشتگ ما اے درگت ءَ سپریم کورٹ ءُ یو۔این۔او ءَ نمدی نبشتہ کُتگ کہ مئے کجام باسکے ءَ سرکاری گل ءِ نیمگ ءَ تاوان بہ رسیت تہ اے ذمہ وار پاکی چیریں ایجنسی اَنت۔