شال : سپریم کورٹ پہ توکلی ءُ روشان ءِ دراھی ءَ کردار بہ کنت ' سیاد

چَہ شال ءَ داتگیں ھالتاکی بیانے ءِ تہ ءَ آواریانی سیاداں گْوشتگ لھتیں ماہ ءَ پیش ماروڈھ ءَ پاکستانی لشکرکشی ءِ میان ءَ ایف سی ءَ روشان ء لالو مری آوار جنگ ءَ پد بیگواہ کرتگ ءُ مارا دنیگت ھال نیست کہ آ کجا ءُ چون اِنت ۔

چَہ ماروڈھ ءِ نہ گیگیں جاور ءُ گرماگی تبد ءُ لیواراں رکھگ ءَ مئے کھول چَہ ماروڈھ ءَ شال ءَ لڈ اِتگ  بلے گْوستگیں نوزدہ جولائی  دوھزار دوازدہ ءَ مئے لوگ ءِ گڈی آسرا آواریں روشان ءِ برات توکلی ھم کہ پہ رمضان ءِ ماہ ءَ سامان زورگ ءَ بازار ءَ روگ ءَ بوتگ گاھی چار راہ ءِ سر ءَ پاکستانی چیریں ادارہ ءُ ایف سی ءَ راہ بستگ ءُ آوار جنگ ءَ پد بیگواہ کرتگ ۔ 

سرجمیں کھول چد ءُ پیش روشان ءِ دیرگیں بیگواھی ءَ ترس ءُ بیم ءِ تہ ءَ اِنت کہ سرکاری ادارھاں مئے دگہ لاپ دئیوک ءُ مئے لوگ ءِ گڈی چارینوک توکلی مری  ھم آوار جتگ ۔ 

آھاں گْوشتگ کہ توکلی ءُ روشان ءِ گوں ھچ رنگیں سیاسی یا جنگی گلاں ھمبستگی نیست دوئیں برات پوریاتگر اَنت ۔ آھاں چَہ پاکستانی سپریم کورٹ ءِ چیف جسٹس افتخار محمد چوہدری ، بلوچستان ہائی کورٹ ءُ انسانی حقانی گل ءَ گوں دزبندی کرتگ کہ آ پاکستانی سرکاری ادارھانی نیمگ ءَ آوار جتگیں توکلی ءُ روشان مری ءِ گوں سلامتی ءَ  دراھی ءَ وتی کردار ءَ  پیش بہ دار اَنت