تپاک راجیں گل ءَ پہ زور بیگواہ کرتگیں بلوچانی دراھی ورکنگ گروپے جوڑ کرتگ ' شیرمحمد بگٹی

 شال : بلوچ ری پبلکن پارٹی ءِ بنجاھی تْرامکاری مجلس ءِ جارکش شیرمحمد بگٹی ءَ چَہ تپاک راجیں گل [ یواین ] ء نیمگ ءَ پہ بیگواھیں مردماں گروپ جوڑ کنگ ءُ ستمبرءَ بلوچستان ءَ دیم دئیگ ءِ ھبربندی وش اَتک کرتگ ۔

آئی ءَ گْوشتگ کہ تپاک راجیں گل ءَ اے گامگیج سک پیسر ءَ زورگی اَت بلے دیر آید درست آید ۔ بلے گروپ ءَ وتا ایوک اسلام آباد ءَ نزدارگی نہ اِنت بلکیں بلوچستان ءِ ھند ءُ دمگاں رسگ ءِ ھم جھد کنگی اِنت کہ ریاستی جبراں نوگو ایریا جوڑ کرتگ اَنت ۔

جارکش ءَ گْوشتگ تپاک راجیں گل ءَ پہ زور بیگواہ کرتگیں بلوچ پسگانی دراھی ءَ یک ورکنگ گروپے جوڑ کرتگ کہ ستمبر ءِ ماہ ءَ اد ءَ سواد کنت ۔اے گروپ ءَ پاکستانی واک ءَ ھم دزبندی دیم داتگ ۔ 

آئی ءَ گْوشتگ ما اے گروپ ءِ جوڑ بوگ ءَ وش اَتک کن اِیں کہ دیر آید درست آید ۔ بلوچ دژمنیں ریاستی واک اول اے گروپ ءَ بلوچستان ءَ آیگ ءَ نہ ھِل اَنت اگاں بئیت ھم آئی ءِ دیم ءَ بازیں گٹ ءُ دار ایر کنگ بیت داں بلوچستان ءَ بیوکیں جبر ءُ انسانی حقانی لگتمالی ءِ راستی دنیا ءِ دیم ءَ پدر مہ بنت ۔ 

آئی ءَ گْوشتگ کہ ما گروپ ءِ ذمہ وار ءُ تپاک راجیں گل ءَ دزبندی کن اِیں کہ اسلام آباد ءَ مہ نند اِیت ءُ سرکارءِ نیمگ ءَ رستگیں ھالانی سر ءَ ایمن مہ بیت بلکیں ڈیرہ بگٹی ، سوئی ، کوھلو ءُ بلوچستان ءِ دگہ ھنکین ءُ ھنداں بروت ءُ انسانی حقانی میان اُستمانی گلانی ھمراھی ءَ آوار جتگیں مردمانی کھول ءَ گوں دوچار بہ کپ اِیت ۔