چَہ راہ گسر کپتگیں بلوچ ، پاکستان ءُ دنیا ءَ گوشگ لوٹ اِیں کہ ما بلوچستان ءِ بندبست ءَ چَہ یک زورگری ءَ ھزارسری گھتری کرت کن اِیں ' ھیر بیار مری

ناروے : بلوچ راج چَہ گلزمین ءِ پھازگ ءِ شَوربندیانی سبب ءَ زورگریں دژمن ءَ پروش دیگ ءُ وتی پروش ءِ منارینگ ءِ نزیک ءَ رستگ اَنت ۔ ھمروچ آئی ءِ جبرانی تہ ءَ شدت ءُ بے میاریں شھروندانی دلسیاہ کنگ ءِ کارپداں ھمے پدر بیت کہ جاور چَہ آئی ءِ دست ءَ درکپتگ اَنت ءُ آجوئی لوٹوکانی دست ءَ آیان اَنت ءُ بلوچستان ءَ آجوئی ءِ جوزگ ءَ ھر بلوچ پہ وتی گلزمین ءِ پھازگ ءَ ساڑی کرتگ ءُ دژمن سرگنوک اِنت ۔ اے ھیال نامی ئیں بلوچ راجدوستیں راھشون ھیر بیار مری ءَ ماں ناروے ءَ گوں بلوچ کمیونٹی ءِ نیمگ ءَ بوتگیں دیوان ءَ لھتیں جستانی پسود یان ءَ کرتگ اَنت ۔ آئی ءَ گوشتگ کہ بلوچ راج وتی شرتریں زھگانی شھادت ءِ مز ءَ چَہ ما آھانی واھگ ءُ اُوستانی جنت آزاد بلوچ ریاست ءِ لوٹ ءَ کن اَنت ءُ من سرپد بئے آں کہ آھانی لوٹ  برحق اِنت پمیشکا ما آھانی باوست ءَ داں برورد ءَ سرکنگ ءَ لانک بستگ ۔ بلوچ راج ءِ تہ ءَ شک ودی کنگ ءُ آجوئی ءِ ندریگانی بے سوت کنگ ءَ ریاستی ادارہ یکیں وھد ءَ پندل ، بیھار ، کشت ءُ کشار ءُ لب دیگ ءِ شتلکاریاں کارمرد کنگ ءَ اَنت بلے بلوچ راج گوں وتی مھکمی ءَ اے شتلیاں بے سوب کنان اِنت ۔لھتیں اے کچ ءَ رستگ ءُ مارا بیم دئے اَنت کہ بلوچستان ءِ سر ءَ دنیا ءَ وتی چم سک داتگ اَنت گڑا من چَہ آھاں جست کن آں کہ ایشی ءِ تہ ءَ ھرابی چی اِنت چَہ ایشی ءَ مارا  وش بوگ لوٹ اِیت کہ ما دنیا ءَ پکار اِنت ءُ ما ارزشمندیں راج ءُ پرارزشیں سرزمینے واھند اِیں ۔آیا چَہ تیل ءِ مڈِ ءَ سر ریچیں عرب امارات ، کویت ، قطر ءُ دگہ بے کساس دولتمندیں ملکانی تہ ءَ دنیا ءِ ھب ءُ ھدوناکی ءِ سامان نیست اَنت المی ءَ ھست اَنت ءُ چَہ کستر ءَ کستریں ملک ھم چَہ اے ھبر ءَ دلاپ نئے اَنت کہ دنیا ءِ دلگوش آھانی نیمگ ءَ اِنت گڑا بلوچ پرچا وتی آجوئی  ءِ جھد ءَ منزل ءَ مہ بارت اگاں بلوچ چَہ پاکستان رنگیں دژمنے ءَ آجوئی گیپت کن اَنت گڑا المی ءَ دیمتر ءَ ھم اے ھاٹیگ اِش بیت کہ وتی گلزمین ءَ بہ پھاز اَنت ۔ چَہ غلامی ءِ تھاروکیاں پہ وت ءَ نوان جاہ ءُ آسیدگی شوھاز کنوک مارا چَہ آجوئی ءِ رژناھی ءَ مہ ترسین اَنت۔ بلوچ راھشون ءَ گوشتگ کہ مارا چَہ دژمن ءَ گلو نیست کہ گوش اِیت ما وتی گلزمین ءِ بندبست ءَ کرت نہ کن اِیں بلے ما گلو کن اِیں گوں ھماھاں کہ وت ءَ بلوچ گوش اَنت بلے دژمن ءِ زبان ءَ گپ جن اَنت ءُ راج ءِ تہ ءَ دلپروشی شنگ کنگ ءِ جھد کن اَنت ۔ من زورگریں پاکستان ، چَہ راہ ءَ گسر بوتگیں بلوچ ءُ سرجمیں دنیا ءَ گوں ستک ءُ باوریں رنگے ءَ گوشگ لوٹ آں کہ ما وتی آزاتیں گلزمینءِ چَہ یک زورگری ءَ ھزار سری گھتریں بندبست کرت کن اِیں بلکیں اے ھم گارنٹی دئے اِیں کہ مئے ملک ءِ تہ ءَ انتہاپسندی ءِ گنجائش نہ بیت ءُ نہ کہ مئے سرزمین پاکستان ءُ ایران ءِ پیم ءَ ڈرگ ٹریفکنگ ءَ کارمرد بیت ۔ ھمے پیم کہ انوں پاکستان ءُ ایران ءِ واکدار ئِے کارمرد کنگ ءَ اَنت ۔ یک جستے ءِ پسوءَ آئی ءَ گوشت کہ پاکستان دمپارہ ھمے گوش اِیت کہ گپ ءُ تران ءُ مئے لھتیں آجوئی لوٹوک ءَ گوں ھبرھال ھست اَنت ۔آئی ءَ گوشت کہ پاکستان گپ ءُ تران کنگ نہ لوٹ اِیت بلکیں سازباز کنگ لوٹ اِیت پمیشکا آئی ءِ توامیں جھد بے سوب بوگ ءَ اَنت ۔ گپ ءُ تران ھما وھد ءَ بیت کہ ھر دو دوادار یک جیڑھے ءَ بہ من اَنت کہ جیڑھے ھست پد ءَ برابری ءِ بنچک ءَ آئی ءِ گیشوار ءِ راہ شوھازگ بنت وھدے کہ مئے دوادار مئے غلامی ءُ وتی زورگری ءَ منگ ءِ جند ءَ ساڑی نہ اِنت گڑا مئے گپ ءُ تران چون بنت ۔ مئے جیڑہ راجی اِنت اگاں ما گپ ءُ تران کن اِیں گڑا چَہ اے ھبراں بلوچ راج ءَ یک پہ سرپد کن اِیں ءُ اے رندی ھبر ایوک آجوئی ءُ میان اُستمانی گارنٹرزانی دیم ءَ بیت ۔ شماھما ھبر ءَ ڈھنڈور کنگ ءَ اِت اے ریاستی شتلکاریں مژگ ءِ اڈ کرتگین اِنت کہ چَہ آجوئی لوٹوکاں یکے ءَ وتی ساز بازانی تہ ءَ ھوار پیش دارگ ءُ راج ءِ چماں کم شرپ کنگ لوٹ اِیت۔ بلے اے ھبر ءِ سر ءَ ما ھدا ءِ منت ءَ گر آں کہ بلوچ راج دنیگت رد نہ کپتگ ۔ گڈی ءَ آئی ءَ ناروے ءِ بلوچ ساڑاتگ اَںت کہ آھاں بلوچ جیڑہ اُستمانی رنگے ءَ دیم ءَ برتگ ءُ ماں آجوئیں ملکانی بلوچاں راھشون بوتگ اَنت کہ دنیا ءِ کجام ھم کنڈی ءَ چِہ کچے ءَ ھم  بہ بنت وتی جبر آماچی ءِ ھبراں داں دنیا ءَ سر کرت کن اَنت ۔