لاھور: طالبانانی اُرش ءَ پہ ھیلکاری اَتکگیں پختونخواہ پولیس ءِ نوسپاھیگ مرتگ

لاھور : پاکستانی طالباناں لاھور ءَ پہ ھیلکاری اَتکگیں خیبر پختونخواہ پولیس ءِ نو سپاھیگ کشتگ ۔ مرتگیں پولیس کارمند زندانی تْرامکار ءُ نوک ھیلکاری زوروک اِت اَنت ۔ پاکستانی طالباناں اُرش سھب ءِ پنچ ءُ نیم ءَ لاھور ءِ میتگ اچھر ءِ رسول پارک نامیں  جاھے ءَ یک ماڑی یے ءَ سر ءَ  کرتگ ۔ پولیس ءِ گْوشگ اِنت کہ اُرشی دہ تپنگی   مردم بوتگ اَنت کہ آھاں دروازگ ٹُک اِتگ ءُ گوں دروازگ ءِ پچ کنگ ءَ رگبار بستگ ۔ پاکستانی طالباناں اے اُرش ءِ ذ٘مہ واری من اِتگ ۔ طالبان جارکش احسان اللہ احسان ءَ گْوشتگ خیبر پختونخواہ ءِ زندانی تْرامکاریں پولیس گوں مئے زندانی سنگتاں چَہ انسانیت ءَ دریں روش ءَ پیش آیگ ءَ اَنت  پمیشکا ما بیر گیپتگ ۔ زانگ بہ بیت کہ پنجاب ءَ راھبند پرینوکیں ادارھانی سر ءَ یکیں ھپتگ ءَ طالبان ءِ اے دومی اُرش اِنت ۔  طالبان ءِ پنجاب ءِ سر ءَ اُرشانی نوکیں دْرچ پہ پنجاب ءَ بیھار ءُ نوکیں آسراتیانی لوٹ ھم بوت کنت چد ءُ پیش ھم طالباناں پنجاب ءِ سر ءَ وتکش ءُ دگہ اُرشانی بیمناکیں دْرچے بنا کرتگ اَت چَر طالبانانی اُرش ءَ پنجاب  سرکار ءُ پولیس مدام لاچار گندگ بنت گْوستگیں دْرچ ھم پنجاب سرکار ءِ گوں طالباناں یک چیریں منگ نامگے ءَ پد دارگ 

بوتگ اَنت ءُ اے رندی ھم ھمے گمان اِنت ۔