بی ایس او ءِ سوبمندیں راجمان دیوان زْرمبش ءِ باج اِنت ' جارکش بی آر پی

شال : بلوچ ری پبلکن پارٹی ءِ بنجاھی تْرامکاری مجلس ءِ جارکش شیر محمد بگٹی ءَ گْوشتگ کہ بلوچ دژمن زورگریں ریاستی واک بلوچ راج ءِ چکچینی ءِ زور ءُ یکشلیں راھبنداں گامگیج اَنت ۔ گْران ءُ گڑتی ئیں جاوراں بلوچ اسٹوڈنٹس آرگنائزیشن آزاد ءِ سوبمندیں راجمان دیوان بلوچ راج زْرمبش ءِ باج اِنت نوک گچین بوتگیں اُگدہ داراں مراد بات دیان اُوست بند اِیں کہ بی ایس او چَہ زوراکی ءُ پلمالی ءِ درکپگ ءَ جھد ءَ برجاہ دار اِیت ءُ بلوچ راج ءِ سنچ ءِ بالینگ ءَ وتی پر اسریں کرد ءَ گون کنت ۔ آئی ءَ چَہ بی ایس او ءَ ھلاس بوتگیں جھدکاراں سوج داتگ کہ ھرکس کہ چَہ بی ایس او ءَ ھلاس اَنت بلوچ ری پبلکن پارٹی ءُ بلوچ نیشنل موومنٹ ءَ گوں ھمبستگ بہ بنت ۔ آئی ءَ ھمے رِد ءَ گْوشان کرتگ کہ بلوچ دژمن ریاست ءَ وتی بلوچ چکچینی گامگیج تیز کرتگ اَنت زوراکی ءُ پلمالی یکشل ءَ برجاہ اِنت گْوستگیں روچ ءَ مچ ، مستونگ ، گوادر ءَ ھوار بلوچستان ءِ بازیں دمگاں زوراکاں بازیں بلوچ پسگ آوار جنگ ءَ پد بیگواہ کرتگ ما پیسر ءَ گْوشتگ کہ بلوچ دژمن ریاست چَہ میان اُستمانی کمک ءَ بلوچاں چکچین کنگ ءَ اِنت ۔ بلوچ پسگ چَہ آمیدگس ءُ راھبنداں در ریاستی شکنجہ جاھاں لٹ کٹ کنگ بوگ ءَ اَنت آ چَہ انسانیت ءَ دریں رنگے ءَ جنگ ءُ جوپگ ءَ پد تیر ءَ گوں دُرشگ بوگ ءَ اَنت ۔ امریکی کانگریس ءِ باسک ڈینا روہاربکر ءَ بلوچستان ءِ سر ءَ بیوکیں زوراکی ءُ ناروائیانی سر ءَ منگ نامگے ھم پیش کرتگ ءُ لوٹ اِتگ کہ پاکستان ءِ مالی کمک دارگ بہ بیت جارکش ءَ گْوشتگ کہ ما چَہ امریکہ ، نیٹو ءُ دگہ ملکاں دزبندی کن اِیں کہ بلوچستان ءَ برجاھیں زوراکی ءُ پلمالی ءِ نیمگ ءَ دلگوشگْور بہ کن اَنت ءُ پاکستان ءِ جنگی ءُ مالی کمک ءَ بند بہ کن اَنت ۔