آوران:بی ایس او ءِ سیشن آسر، نوکیں اُگدہ داراں سوگند وارتگ

آواران : بی ایس او آزاد ءِ نوزدھمی کونسل سیشن ءَ پد گچینکاریانی مستر ءَ  نوک گچین بوتگیں اُگدہ دار سوگند وارینتگ اَنت ۔ بی ایس او آزاد ءِ پریس ریلیز ءِ رد ءَ ھپت جولائی دوھزار دوازدہ ءَ بنا بوتگیں راجمان دیوان کہ آواران ءَ برجم دارگ بوتگ اَت ھشت جولائی ءِ شپ ءَ گوں نوک گچین بوتگیں اُگدہ دارانی سوگند واری دیوان ءَ آسر ءَ رست ۔ بی ایس او ءِ راجمان دیوان ءَ بازیں بنگپ ءُ سر ھالانی سر ءَ ھمترانی ءُ جیڑگ ءَ پد گوں جاوراں ھمدپ نوکیں شوربندگ بوتگ ۔ گچینکاریانی مستر ءَ نوک گچین بوتگیں کاردار ءُ بنجاھی مجلس ءِ باسک ءَ گوں تْران کنان ءَ بی ایس او ءِ باسک ءُ سرجمیں راج ءَ مرادبات داتگ ءُ گْوشتگ کہ گوں بی ایس او ءَ بازیں اُوست بندوک اَنت ءُ من واھگ دار آں کہ نوک گچین بوتگیں سنگت آزاتی ءِ گرانیں راہ ءَ آیوکیں جنجالانی گوں دلیری ءَ دیمپانی کن اَنت ءُ پہ آجوئی ءِ کاروان ءِ منزل ءَ رسینگ ءَ ھچ رنگیں دیمونی  چک ءُ پد نہ بنت ۔ نوک گچین بوتگیں چیئرمین ءَ گوں مراگاہ ءَ گپ جنان گْوشتگ کہ بی ایس ا و چَہ وتی ھزارھا باسکانی دیمونی ءَ بلوچ راج زْرمبش ءِ اولی سْرپ ءَ اُوشتوک اِنت کہ آئی ءِ گوں زْرمبش ءَ ستکی ءِ مانزمان اِنت ءُ من ءَ باور اِنت کہ منی لیکوی سنگت ھمک جاورانی گوں دلیری ءَ دیپمانی کنان آجوئی ءِ سپر ءَ وتی جھد ءَ برجاہ دار اَنت ۔ مروچی اگاں ماں جھان ءَ بلوچ زرمبش ءَ نام کشتگ گڑا سبب ھم بی ایس او آزاد ءُ دگہ راجدوستیں گل اَنت کہ آھانی باسکاں وتی تنگوئیں سر  پہ راج آجوئی ءَ نْدر کرتگ ءُ ھما دروگ بند ءُ بدکاراں سھرائیں رنگے ءَ کلو دیم داتگ کہ زورگر ءِ پارلیمان ءِ تہ ءَ نشتگ ءُ بلوچ گلزمین ءِ سودا ءَ جنگ ءَ اَنت مروچی ھمک بلوچ سنچدار ءُ ریاست ءُ آئی ءِ کاسک چٹانی پندلاں آژناک اِنت ءُ آیوکیں وھد چَہ ریاستی کاسگ چٹاں وت ھساب ءُ کتاب کنت ۔ گوں مراگاہ ءَ نو ک گچین بوتگیں سینئر وائس چیئرپرسن، جونیئر وائس چیئرپرسن ، سیکریٹری جنرل ءُ دگہ اُگدہ داراں تْران کنان ءَ گْوشتگ کہ راجدپتر گواچن اِنت کہ چَہ ما پیش گْوستگیں چیردست ءُ لگتمالیں راجاں ھم پہ وتی آجوئی ءَ گوں زبردست ءُ زورگراں ھونواریں جنگ کرتگ مروچیں آھانی پدریچ مان دنیا ءَ پر مڑاھیں زند گوازینگ ءَ اَنت ءُ ما ھم آجوئی ءِ گْرانیں راہ ءَ ھزارھانی سرانی دیمونی ءَ سیگیگ نہ اِنت بلکیں اے ندریگاں مئے ارادگ ءُ جوزگ گیشتر مھکم کرتگ اَنت پرچا کہ ما درس سرپد اِیں کہ آزادی رنگیں بے بھائیں چی ابید چَہ سرانی نْدر کنگ ءَ نہ رس اِیت آزادی ءِ پُل چَہ ھوناپ ءَ رُد اِیت ءُ مزن بنڈیں درچکے جوڑ بیت ریاست ءُ آئی ءِ کاسگ چٹ اے ھبر ءَ شر دلگوش بہ کن اَنت کہ ھما زْرمبش ءِ آس کہ شھیداں گوں وتی ھوناں بلینتگ آئی ءِ توسینگ آھانی وس ءِ کارے نہ اِنت ۔ اے یک لیکوی جنگے کہ سنچ ءُ پگر ءِ بنچک ءَ بوگ ءَ اِنت بدواہ ستر پندل بہ کن اَنت نوں آجوئی ءِ کاروان ھچ گونگ ءَ نہ اُوشت اِیت ۔