زورگریں پاکستان سرکار ءِ لشکرکشی چمالنگ ، سوئی ءُ ڈیربگٹی ءِ ھنداں برجاہ اِنت ءُ سیاسی جھدکار آوار جنگ ءُ کشگ بوگ ءَ اَنت ' بی آر پی

شال : بلوچ ری پبلکن پارٹی ءِ بنجاھی جارکش شیر محمد بگٹی ءَ بلوچستان ءَ لشکر کشی ءِ بند کنگ ءِ ھبر سرکاری سیاہ دروگ نامینتگ ءُ گوشتگ کہ بلوچ دژمنیں ریاست مرگ ءِ کنڈ ءَ رستگ بلوچ راج ءَ تپاکی ءُ یک مشتی پیش دارگ لوٹ اِیت ۔ بیان ءِ تہ ءَ گوشگ بوتگ کہ چمالنگ ،سوئی ءُ ڈیرہ بگٹی ءِ دمگاں لشکر کُشی برجاہ اِنت کہ آئی ءِ تہ ءَ نوکتریں سلاہ گوں دزپچی ءَ کارمرد کنگ بوگ ءَ اَنت ۔ چَہ زورگر ءِ نیمگ ءَ لشکر کشی ءِ بند کنگ ءِ ھبر مھلوک ءِ چماں پُرچنڈگ ءِ بسات اِنت بلے بلوچ دژمن ، بے سوبیں ریاست بلوچ ءِ چماں بست نہ کنت ۔ بلوچ راج ءَ گوں وتی مھکمی ءَ ریاست دوراھی ءَ آئورتگ ءُ اُوشتارینتگ کہ اد ءَ مرگ آئی ءِ بھت ءَ نوشتگ بلوچ یک مشت بہ بنت ۔ بلوچاں چکچین کنوکیں پالیسیانی سر ءَ گام جنیں ریاست ءَ گوستگیں ھپتگ ءَ چَہ جعفرآباد ءِ ھںد ڈیرہ اللہ یار ءَ بلوچ پسگ دزگیر کرتگ ءُ بیگواہ کرتگ اَنت ۔ سئے شمبے ءِ روچ ءَ بی آر پی ءِ جھدکار اقبال ءِ تیر جتگیں میت دور دیگ بوتگ چَہ ایشی ءَ پیش بلوچ نیشنل موومنٹ ءِ راھشوں ناکوخیر بخش ءِ جتگ ءُ چوپتگیں میت دزکپتگ ۔ اے رنگیں جبرناکیں کارپد ءَ بلوچ راج چَہ آجوئی ءِ جھد ءَ دستکش نہ بیت بلے دژمن چَہ وتی توامیں بے راھیں کارپداں بلوچ راج ءِ آجوئی ءِ راہ ءَ بست نہ کنت ۔ بلوچ راج آجوئی ءِ جھد پہ وتی مراد ءَ روگ ءَ اِنت ۔ منزل نوں دور نہ اِنت ۔ بیان ءِ تہ ءَ گوشگ بوتگ کہ بلوچستان ءَ ھمے رنگ ءَ جبربرجاہ اِنت بلے اے رنگ ءَ دلگوش دیگ نہ بوگ ءَ اِنت کہ دیگ لوٹ اِیت ۔ انسانی حقانی گل ءُ داررسیں ادارھانی نیمگ ءَ ایوک زبانی گپ جنگ بوگ ءَ اِنت چَہ راھبنداں دریں دزگیری ، بیگواھی ءُ بلوچ پسگاںی تیرجتگیں میتانی دزکپگ ءَ پد میان اُستمانی ادارہ اشتاپی وتی کردگار ءَ پیش بہ کنت ۔