ناروے : بلوچستان ءِ آجوئی پاکستان ءَ ناں بلوچانی جتائیں لیکواں داشتگ ، پاکستانی پارلیمان ءِ باھوٹ ءُ چَہ پاکستان ءَ ھیر لوٹوک گلزمین ءُ راج پھازی ءِ جھد ءِ بھر بہ بنت ' ھیر بیار مری

ناروے : شھید بالاچ  ءِ پجیگ ءَ درسیں شھید پہ بلوچستان ءِ آجوئی ءَ شھید بوتگ اَنت ، آھآںی یات کنگ ءُ آھاں ساڑایگ ءِ چَہ درساں جوانتریں راہ اِیش اِنت کہ ما آھآنی واب  آجوئیں بلوچستان ءَ پیلو بہ کن اِیں ۔ اے ھبر نامداریں راجی سروک واجہ ھیر بیار ءَ ناروے ءِ بنجاھی شھر اوسلو ءَ چَہ بی ایس او آزاد ءِ نیمگ ءَ برجم داشتگیں یاتگیری دیوان ءَ گپ جنان ءَ گوشتگ ۔آئی ءَ گوشتگ کہ بلوچ شھیدانی درچ ھما وھد ءَ بنا بوتگ وھدے کہ پاکستان ءُ ایران ءَ مئے زمین دستیگ کرتگ ءُ بلوچ پہ وتی ماتیں گلزمین ءِ پھریزگ ءَ دستکش نہ بوتگ ءُ غلامی نہ من اِتگ ئِے ۔ ھمیشی ءِ ڈنڈ ءَ بلوچ چکچین کنگ بوگ ءَ اَنت ۔مئے دپتر گواچن اِنت کہ ما توامیں اُرش کنوکاں دیم پہ دیم بوتگ اِیں ۔چَہ مزن سکندر ءَ بہ گر داں مغل ، منگول ءُ انگریزاں ھچ رنگیں واک ءُ زوراں بلوچانی سر ءَ ھاکمی کرت نہ کرتگ پمیشکا مارا باور اِنت کہ ایران ءِ گجر ءُ پاکستان ءِ پنجاپی ھم  دیر ءَ یا زوت  مئے گلزمین ءِ یلہ کنگ ءَ لاچار بنت ۔ بلوچ راھشون ءَ گوشتگ کہ اے دوئیں ملک ءَ  اسلام ءِ نام ءَ مارا غلام کرتگ ءُ مئے گلزمین ءِ گرانبھائیں مڈیاں گوں دوئیں دستاں پلگ ءَ اَنت۔ اے اسلام ءِ مِھتریں نام ءَ  پہ زورگری ءُ لٹ ءُ پلی مولاں کارمرد کنگ ءَ اَنت ۔پاکستان ءِ اسلامی فوج ءِ  اصلی کردگار بنگلہ دیش ، سعودی عرب  ءُ اُردن ءَ پدر بوتگ ۔ بلوچ راج نوں دژمن  ءِ ھرچ رنگیں پندلاں آژنا اِنت ءُ اے راستی ءَ جوانی ءَ زانت ھما کہ مئے مسلمان ءُ کافری ءِ  سرٹیفکٹ جاڑی کن اَنت ءُ  پہ ما ڈنڈ سوج کن اَنت ۔ ما چَہ آھاں پیسرگیں مسلمان اِنت ءُ اسلامی براتی ، رواداری  ءُ دگرانی ھیال ءُ لیکواں شرپ دیگ ، ھزارھاں سال اِنت کہ مئے دستور ءُ راھبندانی بھر اَنت ۔ دپ ءِ سر ءَ مارا برات گوشگ بیت بلے راستی ءَ آھانی ءُ مئے سیادی واجہ ءُ غلام ئیگ اِنت کہ کہ مئے گلزمین ءَ دستیگ کنگ ءُ مئے راجی پجارءَ ایرانی ءُ پاکستانی ءَ بدل کنگ ءُ مئے نام ءُ نشان ءَ گار کنگ لوٹ اَنت ،پمیشکا ما اے آسرءَ سر بوتگ اِیں کہ مئے سرزمین ، پجار ، دود ءُ ربیدگانی پھریزگ ءَ المی اِنت کہ ما پہ وتی آجوئیں ریاستے ءِ جوڑ کنگ ءَ جھد بہ کن اِیں ۔ بلوچ راھشون ءَ گوشتگ کہ چَہ مئے شھیدانی ندریگ ءُ بلوچانی پر ایمنیں سیاسی جھد  ءُ بلوچ دیمپانی ءِ جنگ ءِ سبب ءَ  ما وتی منزل ءِ نزیک ءَ رستگ اِیں ۔ مروچی اولی رند ءَ ما سما کنگ ءَ اِیں کہ دنیا بلوچ آجوئیں ریاست ءِ جوڑ کنگ ءَ گوں سنگینی ءَ چاربچار کنگ ءَ اِنت ۔ دمگ ءِ تہ ءَ نوکیں سرپ بندیانی درگت ءَ ھم سوڈگ بوگ ءَ اِنت ھمے لوٹانی پد ءَ ما بلوچ لبریشن مینی فیسٹو ءَ جوڑ کنگ ءَ اِیں  کہ زوت دیم ءَ آرگ بیت ۔آئی ءِ تہ ءَ آجوئیں بلوچستان ءِ ریاستی وڑ پیم ءُ ڈل ڈب دیم ءَ آرگ بنت ۔چَہ آئی ءَ بلوچ راج ءُ سرجمیں دنیا ءَ مئے ھبرانی سرپد بوگ ءَ آسانی بیت کہ ما پہ چونیں بلوچ ریاستے ءِ جوڑ کنگ ءَ جھد کنگ ءَ اِیں ۔ چَہ ایشی ءَ پد ما آجوئیں بلوچستان ءِ بنداتی کارراھبند ءَ ھم دیم ءَ کار اِیں ۔چَہ لٹ ءُ پل ءَ پاکیں چاگرد ، یک مردمے یک ووٹ ءُ سوشل گارنٹی اے کارراھبند ءِ بنکی بَھر بنت ۔ ھیر بیار ءَ گوشتگ کہ ما پہ نوکیں آجوئیں بلوچ ریاست  ءِ مینی فیسٹو ءُ کارراھبند  جوڑ کنگ ءَ سرج٘یں بلوچ ءَ گوں دزبندی کن اِیں کہ آ مارا سر ءُ سوج بہ کن اَنت کہ آ وتی گلزمین ءَ چِہ رنگ ءَ گندگ لوٹ اَنت ءُ آھانی نز ءَ چونیں کارراھبند اڈ کنگ بہ بیت کہ  پہ مردماں سوتمند ءُ انسان دوستیں ملکے اڈ بہ بیت کہ نہ ایوک پہ دنیا ءِ سرمایہ کاری ءَ مناسب ءُ پھریز بہ بیت بلکیں اے دمگ ءَ مذھبی رواداری و مزنیں انسانی راہ ءُ راھبندانی پاسداری ءِ گھتریں درورے بہ بیت ۔ھیربیار ءَ گوشتگ کہ بلوچ راج ءَ اے وھدءَ  تپاکی ءُ یکجاھی لوٹ اِیت ۔ پمیشکا ما اے یاتگیری دیوان ءِ  کمک ءَ  سرجمیں بلوچاں آجوئی ءِ یک نکاتی ایجنڈہ ءِ سر ءَ یکجا ءُ تپاک بوگ ءِ لوٹکی دئے آں ءُ اپیل کن آں کہ آ بلوچ پاکستان ءِ پارلیمان ءِ باھوٹ بوگ ءِ بدل ءَ بلوچ سرزمین ءُ پجار ءِ پھازگ ءِ جھد ءِ بھر جوڑ بنت ۔ مروچی بلوچستان ءِ آجوئی پاکستان ءِ زوراکیاں نہ داشتگ بلکیں بلوچانی تہ ءَ انچیں مردم ھست کہ چَہ آھانی کارپداں بلوچ ءِ آجوئی مھتل اِنت کہ دنیگت چَہ پاکستان ءَ ھیر لوٹوک اَنت ،پمیشکا مارا ماں دنیا ءَ وتی کیس ءِ پیش کنگ ءَ مشکل بوگ ءَ اِنت۔وھدے کہ یک بلوچے آجوئی ءِ گپ ءَ بہ جنت ءُ دومی حق ءُ واک ءِ لوٹاں دیم ءَ بیار اِیت گڑا اے رنگ ءَ آپہ مئے سرپدی ءَ مانگیش اَنت کہ آئی ءِ سوت ایوک زورگریں ریاست ءَ بیت ۔ھیر بیار ءَ  چَہ گلزمین ءَ دریں بلوچ برات ءُ گھار ءَ گوں دزبندی کرتگ کہ آ بلوچستان ءَ بیوکیں ریاستی بربریت ءُ وتی راج آجوئی ءِ ھبر ءَ گیشتر پر اسر بہ کن اَنت پرچا کہ بلوچستان ءَ یک جھدکارے ءَ بہ گر داں آجوئی لوٹوکیں راھشوناں درس ریاستی ڈیتھ اسکوارڈ ءِ نشانگ اَنت ءُ آ اُود ءَ توار چست کنگ روچ پہ روچ گرانتر بیان اِنت پمیشکا اے کمی آزاد ملکاں نشتگیں بلوچاں ھرچ تک ءَ سرجم کنگی اِنت ۔آئی ءَبی ایس او آزاد ءِ ندریگ ساڑاتگ ءُ گوشتگ کہ اے اسٹوڈنٹ آرگنائزیشن ءَ پہ ماتیں گلزمین ءَ گرانبھائیں ندریگ داتگ ءُ دنیا ءِ رواج گیپتگیں راھبندانی پد ءَ سیاسی ءُ اُستمانی رنگ ءَ دژمن ءِ  دیم ءَ گوں نترسی آجوئی ءِ گپ جتگ ۔ مروچی اوسلو ءَ بی ایس او آزاد ءِ بنزہ ءِ پچ بوگ پہ ما درساں ھاٹیگ دھیں ھبرے ۔ دژمن چَہ وتی درسیں فرعونیت ءَ ابید ھم ایشی ءِ بھادری ءِ ھلاس کنگ ءَ سوبمند نہ بوتگ بلکیں ریاستی زوراکیاں ابید ھم پہ بلوچ راج ءِ دل ءَ آھانی مڑاہ ءُ شرپ دوسری گیش بوتگ کہ آ بلوچستان ءِ پجیگ ءَ یورپ ءَ ھم  بنزہ جوڑ کنگ ءَ اِنت  ۔اے گل شھیدانی راستیں پشتپد اَنت ءُ آھانی کاروان ءِ دیم ءَ برگ ءَ پیشگی رنگ ءَ پُر ھاٹیگ اَنت۔ یاتگیری ریفرنس انٹر نیشنل وائس فار بلوچ مسنگ پرسنز اوسلو ءِ کوارڈینیٹر ڈاکٹر مصطفی بلوچ ءُ  بی ایس او آزاد اوسلو ءِ کماش وحید بلوچ ءَ ھم گپ جتگءُ واجہ ھیر بیار ءُ دگہ مھمانانی منت گیپتگ ءُ گوشتگ کہ  آ بلوچ راجی جیڑہ ءَ دنیا ءِ کنڈ کںد ءَ سر کنگ ءَ گام گام ءَ آجوئیں لوٹوکیں راھشونانی ھمراھداری کنت ءُ آئی ءِ کیبنٹ بی ایس او آزاد ءِ آشوبی پروگرام ءَ دنیا ءِ کنڈ کنڈ ءَ سر کنگ ءَ ھچ رنگیں کمی یے پشت نہ دنت ۔ گڈی ءَ بی ایس او آزاد ءِ بنجاھی راھشون ءِ کلو ھم وانگ بوتگ ۔