کراچی : ریجنرز ءَ بازیں ملامکارے دزگیر کرتگ

کراچی : پہ کراچی ءِ ایمن کنگ ءِ نام ءَ رینجرز آپریشن برجاہ اِنت۔ لیاری ءَ دیم  پہ دیم تیرگواری ءَ پد پولیس ءَ دو ملامکار دزگیر کرتگ ءُ چَہ سمن آباد ءَ زور چانیگ گرانی کارندھے ھم دزگیر کرتگ کہ نام ئِے سہیل چریا گوشگ بوگ ءَ اِنت چَہ چریا ءَ چَہ یک لکھ ءَ برز زر ھم گرگ بوتگ کہ پولیس ءِ گوشگ ءِ رد ءَ اے ھما زور چانیگ اَنت کہ چَہ مردماں گرگ بوتگ اَنت ۔ چَی ایشی ءَ پد گزری ءُ ضیاکالونی ءِ دمگاں ریجنرز ءَ سرچ آپریش کرتگ ءُ چَہ درزنے ءَ برز مردم دزگیر کنگ ءَ پد چَہ آھاں سلاہ گیپتگ ۔چَہ کٹی پہاڑی ءَ نورالدین نامیں مردمے ھم دزگیر کنگ بوتگ کہ پولیس ءَ پہ مردم کشگ ءِ ملام ءَ گیپتگ ۔ چَہ ھمیشی ءِ نشاندھی ءَ اورنگی ٹائون شاہ فیصل بلوچ میتگ ءَ یک شکنجہ جاھے ھم درجنگ بوتگ کہ لوگے ءِ زیرزمین ءَ جوڑ کنگ بوتگ ۔ چَہ ملامکار ءَ دو پستول ءُ یک ھڈ گڈیں کارچے ھم دزکپتگ ۔