مستونگ : ندریگ ءُ یکشلیں جھد ءَ سامراج ءُ کاسگ چٹانی کارکرد پدر کرتگ اَنت ' بی ایس او آزاد

مستونگ: بی ایس او آزاد ءِ جارکش ءَ بیان داتگ کہ بنگلہ دیش ءَ سلاھاں چگل دیوک ، فلسطین ءَ ازرائیل ءِ گوشگ ءِ پد ءَ سی ھزار بے میاریں فلسطینیاں بے دردی ءَ گوں کشوک ، ءُ اسلام ءِ نام ءِ سر ءَ ھزارھاں اوگانیاں کشارینوک ، پہ ڈالراں بے کساس عرباں امریکہ ءِ دست ءَ بھا کنوک ءُ بے سلاھیں بلوچ سیاسی کارکناں آوار جنگ ءَ پد شھید کنوکاں غازی نہ بلکیں دنیا کشندہ ءُ اشرار ءِ نام ءَ زانت ءُ توار پرکنت ۔ جارکش ءَ گوشتگ کہ سامراج ءُ زورگرانی چَہ بن ءَ ھمے راھبند بوتگ کہ آ گوں وتی گالبند ءُ دروگیں کارپداں ڈھندور کن اَنت داں آھاںی سامراجی لٹ پل ، زورگری ءُ کشت ءُ کشارشر ءُ جوان  لیکگ بہ بنت  بلے دنیا ءِ دپتر گواچن اِنت کہ سامراجی کشندھانی ءُ آھانی ھندی کرے ءِ کشندھان وتی  ھون رَج اِتگیں دست  گوں مذھب ، دیمروی، وژھالی ءُ دودمان سوج دیگ ءِ  دستانگ ءَ چیر دیگ ءِ جھد کرتگ بلے چیر دستیں راجانی یکشلیں جھد ءُ بے دروریں ندریگاں سامراج ءُ آھانی کاسگ چٹانی درسیں کارکرد پدر کرتگ اَنت ۔