فریڈم فلوٹیلا ءِ جيڑہ: امريكا ءِ تها كپگ ءُ سلاه كار بيئگ ءِ ضرورت نہ اِنت.احمد داؤد اوگلو

انقرہ (هال) ترک درى كارانى وزير احمد داؤد اوگلو ءَ گوشتگ "فریڈم فلوٹیلا " ءِ زِرا كُمكى گلانى سرا ازرائيلى اُرش ءِ دَرگت ءَ وتى بُنكى گپّ ءَ چہ پد نہ کِنزاِتگیں، امريكا ءِ تها كپگ  ءُ سلاه كار بيئگ ءِ ضرورت نہ اِنت. تانكہ ازرائيلى سركار چہ تُركى ءَ پہلی نہ لوٹیت تا گڑا اے گپچل اَست ءُ برجاه اِنت. احمد داؤد اوگلو ءَ رَسانكى مراگشے ءَ تران كنان ءَ گوشتگ، اسرائیل ءُ  امریکا  تُركى ءِ لوٹ ءُ گزراں سرپد بہ بنت. ازرائيل اگاں سيادى ءِ برجاه دارگ ءِ واهشت ءَ داريت تا آئى ءَ مئے لوٹ مَنّگی اَنت.يک هالكارے ءِ جُست ءِ پسَہ ءَ آئى ءَ دَرّائينتگ مئے ميان ءَ هچ مُلک ءَ دَزمانجى كنگ ءِ ضرورت نہ اِنت، يک جُستے پسَہ ءَ آئى ءَ گوشتگ آيوكيں هپتگ ءَ ترک مزن وزیر رجب طیب اردگان امریکا ءِ تَرّ ءُ تاب ءَ رؤت، ءُ اوباما ءِ گم ءَ آئى ءِ گپ ءُ تران ءِ بُنكى "ايجنڈا" آں تُركى ءِ ءُ ازرائيل ءِ ميان ءَ جيڑہ ءِ گیشءُ گيوار هم هوار اَنت. ءُ تُركى  امریکی صدر ءِ ديم ءَ وتى بُنكى موقف ءَ پیش كنت. ازرائيل ءِ تُركى ءِ ميان ءَ سياسى جيڑہ فریڈم فلوٹیلا ءِ زِرا تُرک كمكى گلانى سرا ازرائيلى کمانڈوز اُرش ءَ رند پیدا بیتگ. ايشى ءَ چہ نوہ كمكى كارِنده بيران بيتگ اَنت. ايشى ءَ پد چہ تُركى ءَ ازرائيلى سفير در كنگ بيتگ ءُ ازرائيل ءِ گُم ءَ دفاعی ءُ تجارتی سيادى پروشگ بيتگ اَنت.  اے جيڑہ ءَ گیشی هما وهد ءَ اَتک کہ گوستگیں ماه ءَ تُرک مزن وزير ءَ اے جار جت کہ آيوكيں وهد ءَ كمكى گلانى همراهى ءَ جنگی گُراب هم ديم ديگ بيت.