جیمڑی ' چَہ ھیژوک ءِ بڈگ ءَ چار مسافر بیران ءُ ھشت بیگواہ

جمیڑی [ جھگیر ] چَہ روکپتی بلوچستان ءِ سیمسری ھند ءَ درکپتگیں مسافربریں ھیژوکے [ اسپیڈ بوٹ ] پسابندن ءُ جیمڑی ءِ میان ءَ بڈ اِتگ ۔ اد ءَ رستگیں ھالانی رِد ءَ ھیژوک ءِ تہ ءَ چَہ دوازدہ ءَ برز مردم سوار بوتگ ۔ چَہ بڈ اِتگیں مسافراں چار مسافر ءِ میت دز کپتگ ھشت دنیگت بیگواہ اِنت ءُ شوھاز کنگ بوگ ءَ اَنت ۔ مسافرانی تہ ءَ جنین ءُ چک ھم ھوار بوتگ اَنت ۔ ھیژوک ءِ بڈگ ءِ سبب چَہ کساس ءَ گیش مسافر سوار کنگ گوشگ بوگ ءَ اِنت ۔ زانگ بہ بیت چَہ ایشی  ءَ سئے سال ءَ پیش ھم پسابندن ءُ جیمڑی ءِ میان ءَ  چَہ مزنیں عید ءَ یک روچے پیش ھم  چَہ ھیژوک ءِ بڈگ ءَ بیست ءُ ھشت مردم بیران بوتگ کہ چَہ آھاں گیشتر مردمانی جون ھم دست نہ کپتگ اَنت ۔ ھندی مردمانی لوٹ اِنت کہ باید ھردو نیمگ ءِ سرکار اے کار ءَ راھبندی وڑ ءُ پیم ءَ کنگ ءِ اجازت بہ دئے اَنت داں اے رنگیں تاوان دارگ بہ بنت ۔ ایشانی راھبندی نہ بوگ ءِ سبب ءَ ھژوکانی  تہ ءَ انسانی جانانی پھریز گ ءِ ھچ رنگیں بندوبست نیست ءُ سرکار ءِ نیمگ ءَ راھداری ءِ راھبندانی نرم نہ بوگ ءِ سبب ءَ ھم گیشتر مردم لاچار اِنت ھمے راہ ءَ سفر بہ کنت ۔