پہ براھند گ ءِ کوش ءَ پاکستانی سرکار ءِ بے تاھیری

اسلام آباد [ ھالچار ] پہ براھندگ ءِ دزگیری ءُ کوش ءَ پاکستان ءِ بے تاھیریاں پدر کرتگ کہ براھندگ  آئی ءِ زورگیری ءِ دیم ءَ انگت چوش کوہ ءَ میلانک اِنت ۔وکی لیکس ءَ امریکہ ءِ گوں پاکستانی گزر ءُ سرکار ءَ ھم پتی ءِ راز پاشک کنان ءَ گوشتگ   کہ امریکہ ءَ  پاکستانی  سرکار ءَ پیشکش کرتگ کہ اگاں آ ملا برادر ءَ امریکہ ءِ دست ءَ بہ دنت گڑا امریکہ آئی ءِ بدل  ءَ بلوچ راھشون براھندگ بگٹی ءَ دزگیر کنت ءُ پہ کشگ ءَ پاکستان ءَ دنت بلے پاکستان ءَ براھندگ ءِ بدل ءَ ملابرادر پہ دیگ ءَ شات کرتگ ءُ اے سودا نہ من اِتگ  ءُ ھمے پیم بلوچ راھشون چَہ پاکستان ءِ دست ءَ کپگ ءَ پھاز اِتگ ۔ بلے انگت  پاکستانی سرکار ءُ ایجنسیانی واکداراں پہ براھندگ ءِ دزگیری ءَ وتی گامگیج برجاہ داشتگ اَنت ءُ اے رد ءَ آھاں ھمے زوت ءَ  گوں سوئس سرکار ءَ ھم لوٹ کرتگ  کہ آ براھند گ ءَ سیاسی باھوٹ  مہ کن اَنت دنیگت سوئس سرکار ءَ اے لوٹ ءِ ھچ پسو نہ داتگ بلے پاکستانی سر کار ءِ وتی گوشگ اِنت کہ سوئس سرکار ءَ دلجمی داتگ کہ آ اے لوٹ ءِ سر ءَ چار ءُ بہ چار کن اَنت ۔ جتی [ اتوار ] ءَ شنگ بوتگیں یک رپورٹے ءِ رِد ءَ پاکستانی سرکار ءَ براھندگ ءِ سرگرمیانی درگت ءَ سوئس سرکار ءَ لھتیں ھال داتگ ءُ آئی ءَ سیاسی باھوٹ نہ کنگ ءِ دزبندی کرتگ ۔آھاں وتی ھالانی تہ ءَ اے الزام جتگ کہ براھندگ بگٹی چَہ پاکستان ءَ گستائی لوٹوکیں گل بلوچ ری پبلکن پارٹی ءُ بلوچ ری پبلکن آرمی ءِ سروک اِنت ءُ آ بلوچستان ءَ سرکار ءِ ماڑی ءُ فورسز انی سر ءَ اُرشانی تہ ءَ گون اِنت ۔ رپورٹ ءِ رد ءَ یک روایرشتی سفارتکارے ءَ پاکستانی سرکار ءِ اے الزام رد کرتگ ءُ گوشتگ کہ براھندگ بگٹی ءِ زند  آجوئی زرمبش ءِ پلہ مرزی کنگ ءِ سبب ءَ  خطرہ ءِ تہ اَنت ۔ براھندگ چَہ ھیربیار ءَ پد دومی بلوچ راھشون اِنت کہ پاکستانی سرکار آئی ءَ سیاسی باھوٹ کنگ ءِ دیم ءَ میلانک اِنت ھیربیار  ھمے سال ءَ برٹش سرکار ءَ سیاسی باھوٹ کرتگ ۔