اسلام آباد' سرکار پہ بیگواھانی درگیجگ ءَ سنگین نہ اِنت

اسلام آباد [ ھالچار ] پاکسان سپریم کورٹ ءَ گوشتگ کہ ھمے گندگ بوگ ءَ اِنت کہ سرکار بیگواھیں مردمانی درگیجگ ءَ سنگینی ءَ جھد کنگ ءَ نہ اِنت ۔ دادجاہ ءِ گوشگ اَت کہ پہ اے مردمانی بازیاب کنگ ءَ جوڑ کرتگیں کمیشن ءِ سروک داد گاہ ءِ پرمان ءَ پد ھم جوڑ کنگ نہ بوتگ ۔ جسٹس ریٹائرڈ فضل الرحمن تھی کارانی وزارت ءِ تہ ءَ پہ بیگواھیں مردماں جوڑ بوتگیں کمیشن ءِ سربراہ بوتگ بلے الکیشن کمیشن ءِ باسک گچین بوگ ءَ پد آ  چَہ اے کمیشن ءِ سروکی  دزکش بوتگ ۔ اسلام آباد ءَ بی بی سی اُرود سروس ءِ جھگیر شھزاد ملک ءَ گوشتگ کہ سپریم کورٹ ءَ اسلام آباد ءِ سرکار پہ اے کمیشن ءِ سروک گچین کنگ ءَ سئے ھپتگ ءِ موہ داتگ کہ ھلاس بوتگ ۔جسٹس ناصرالمک ءِ سروکی ءَ سپریم کورٹ  ءِ دو باسکی بنچ ءَ بیگواھیں مردمانی درگت ءَ جتائیں درخواست گوش داشتگ اَنت ۔ بنچ ءِ سروک ءَ گوں اٹارنی جنرل کے کے آغا ءَ جست کرتگ کہ داد گاہ ءِ پرمان ءَ پد ھم اے کمیشن ءِ سروک پرچا نامینگ نہ بوتگ ۔ ایڈیشنل اٹارنی جنرل ءِ گوشگ اَت کہ تھی کارانی وزیر رحمان ملک کراچی ءَ ایمنی ءِ جاورانی چارگزاری ءَ ھما شھرءَاِنت پمیشکا اے درگت ءَ گپ ءُ تران نہ بوتگ۔ داد گاہ ءَ گوشتگ کہ اگاں کراچی ءَ مردمانی جان ءُ مالانی پھریزگ سرکار ءِ ذمہ واری اِنت گڑا بیگواھیں مردمانی بازیاب کنگ ھم سرکارءِ سر ءَ اِنت کہ گوستگیں بازیں سالاں آھانی دوست ءُ مردم راھچار اَنت ۔ ایڈیشنل اٹارنی جنرل ءِ گوشگ اَت کہ بیگواھیں مردمانی درگت ءَ جوڑ کرتگیں کمشین بے سروکی ءَ ھم کار کنگ ءَ اِنت اے ھبر ءِ سر ءَ بنچ ءِ تہ ءَ ھواریں جسٹس طارق پرویز ءَ ریمارکس دیان ءَ گوشتگ کہ گوستگیں چیئرمین ءِ دزکش بوگ ءَ پد داں انوگ ءَ یک ھم بیگواھے درگیجگ نہ بوتگ ۔ آئی ءَ گوشتگ کہ داں انوگ ءَ ھمینچک مردم درکپتگ آ دادجاہ ءِ دزمانجنی ءَ درکپتگ اَنت باید سرکار چَہ وت ءَ ھم گامگیج بہ زور اِیت ۔ایڈیشنل اٹارنی جنرل ءَ چَہ دادجاہ ءَ لوٹ اِتگ کہ سرکار ءَ دو ھپتگ ءِ موہ دیگ بہ بیت داں اے میان ءَ بیگواھیں مردمانی درگیجگ ءَ جوڑ بوتگیں کمیشن ءِ سروک نامینگ بہ  بیت ۔ ڈیفنس آف ھومین رائٹس ءِ چِیرپرسن آمنہ مسعود جنجوعہ گوشتگ کہ آ انٹلی جنس ءِ ھما کارندھانی نام ءَ گوشت کنت کہ آھاں آئی ءِ لوگواجہ ءُ دگہ مردم آوار جتگ اَنت ۔دادجاہ ءَ نامگیپتگیں جنین آدم ءَ گوشتگ تو ھرچے گوشگ لوٹ ئے دادجاہ بہ نویس ءُ بہ دئے ۔ کے کے آغا ءِ گوشگ اَت کہ ایجنسیانی گور ءَ ھمینچک مردم ھست دنیگت آھانی درگت ءَ سرجمیں مالومداری دیگ نہ بوتگ ۔دادجاہ ءَ ایڈیشنل اٹارنی جنرل اے درگت ءَ سرجمیں ھال پیش کنگ ءِ پرمان کرتگ ۔اے درخواستانی گوش دارگ داں بیست ءُ شش ستمبر ءَ دارگ بوتگ ۔