لندن ' اے پدر بوت کہ بابا موسی برطانیہ ءِ فوج ءَ کشتگ

لندن [ جھگیر ] داں سالے ءَ برجاہ بوگ ءِ پول ءَ پد اے گواچن بوت کہ یک عراقی مردمے برطانیہ ءِ فوجیانی دست ءَ شکنجہ بوگ ءَ پد مرتگ ۔ پول ءِ رِد ءَ برطانیہ ءِ فوجیاں ترامکاری راھبندگوں  سنگینی ءَ پروشتگ اَنت ۔ انکوائری ءِ چِیئر مین سر ولیم گیگ ءَ ماں عراقن ءَ جست پرس کنگ ءِ بے راھبندیں رپک کارمردکنگ ءِ الزام  پھازکاری وزارت[ وزارت دفاع ] ءِ سرءَ جتگ ۔ باباموسی نامیں عراق ءِ جاھمنند دو ھزار سئے ءَ بصرہ ءَ برطانیہ ءِ فوج ءِ زندان ءِ تہ ءَ مرتگ آئی ءِ بالاد ءَ نود ءُ سئے ٹپ پر بوتگ ۔برطانیہ ءِ سر وزیر ڈیوڈ کیمرون ءَ گوشتگ کہ اے رنگیں کار دیمتر ءَ مہ بیت ۔ کامن ھائوس  ءَ  داتگیں بیان ءِ تہ  ءَ پھازکاری وزیر لیئم فوکس ءَ گوشتگ فوج بازیں بندبستی کارانی تہ ءَ سوبمند نہ بوتگ بلے گچینی جاورانی تہ ءَ پہ زند ءِ پھریزگ ءَ گچینی زبان ءُ انچیں رِپک  کارمرد کنگ بہ بیت کہ آھاںی گوں بالاد ءَ سیادی مہ بیت ۔ آئی ءَ گوشتگ کہ انکوائری رپورٹ ءِ تہ ءَ داتگیں ھپتاد ءُ سئے سوجانی سر ءَ اے یکیں سوج اِنت کہ آھاں  زرت نہ کرتگ ۔ بلے اے ھما وھد ءَ کاربندگ بیت کہ مردمانی ءُ جاورانی درگت ءَ مالومداری سرجم بنت ۔لیئم فوکس ءَ دیمتر ءَ گوشتگ کہ ھرچے گوں بابا موسی ءُ   آئی ءِ سنگتاں ستمبر دو ھزار سئے ءَ بوتگ آ ناباور ، اجکہ کنوک ءُ شرمناک اِنت ۔ مئے فوج ءِ تہ ءَ گوں بندیگاں ناروائی پیش کپگ ءِ ھچ جاہ نیست ۔ برطانیہ ءِ فوج ءِ سروک جنرل سر پیٹر وال ءَ گوشتگ کہ ھرچ کوشے ءَ پد چست بیوکیں  شرمناکیں جاور پہ فوجیانی جوانیں کردگار ءِ سر ءَ سیاھیں ساھگے جوڑ بیت ۔آئی ءَ گوشتگ کہ اے کوش ھما وھد ءَ بوتگ کہ وھدے آئی ءِ فوج  چَہ دوستی ءَ زبھر ءُ تکانسر کنوکِں چیلنجزانی دیمپانی کنگ ءَ بوتگ بلے ترامکاری [ نظم وضط ] ءِ پروشگ ءُ بدروشے [بداخلاقی ] ءِ ھچ رنگیں جواز بوگ نہ لوٹ اِیت ۔موسی گوں دگہ نو عراقیانی ھمراہ چَہ  بصرہ ءِ یک ھوٹلے ءَ چاردہ سمتبر دوھزار سئے ءَ دزگیر کنگ بوتگ ۔ آ برطانیہ ءِ فوج ءِ کوئینز لنکا شائر رجمنٹ ءِ اولی بٹالین ءِ کارندھاں دزگیر کرتگ ۔ انکوائری ءِ چِیرمین سرولیم گیگ ءِ گوشگ ءِ رد ءَ بازیں فوجیاں موسی ءُ آئی ءِ سنگت شکنجہ کرتگ اَنت ءُ لھتیں فوجی سروک ھم ھوار بوتگ کہ اے جاور ءَ سرپد بوتگ اَنت ۔ آئی ءَ بٹالین ءِ تہ ءَ شریں روش ءِ کمی ءِ سر ءَ ایراد گیپتگ ۔ آئی ءَ گوشتگ کہ اے کوش فوج ءِ کارپدانی سر ءَ یک سیاھیں ٹکے ءُ ایشی ءَ بے شک ءَ عراق ءَ اے بٹالین ءُ برطانیہ ءِ دگہ یونٹانی شریں کارکردگی تاوان داتگ ۔