کابل ' احمد خپل واک چَہ مئے ردی ءَ مرتگ 'ایساف

کابل [ ھالچار ] اوگانستان ءَ نیٹو ءِ کمان ءَ جنگ کنوکیں فوج ایساف ءَ من اِتگ کہ ھمے سال ءِ جولائی ءَ بی بی سی ءِ نامہ نگار احمد امید خپل واک چَہ ھماھانی ردیاں مرتگ ۔ ایساف ءَ گوشتگ کہ یک امریکی فوجی یے ءَ اوگانستان ءِ اُستان ارزگان ءِ یک کوچگی دمگ ترین کوٹ ءَ وتکش اُرش کارے سرپد بوتگ ءُ کشتگ ۔ امریکی فوج ءِ اے کارروائی ءِ تہ ءَ نوزدہ مردم بیران بوتگ چَہ ھمیشاں احمد اُمید خپل واک ھم ھوار بوتگ ۔ نیٹو ءَ چَہ اے کشتار ءَ یک انکوائری یے بنا کرتگ ۔ چَہ نیٹو ءِ انکوائری ءَ اے ھبر دیم ءَ اَتکگ کہ خپل واک ایساف فوج ءِ اُرش ءِ وھد ءَ جانشودگ ءِ جاہ ءَ چیر بوتگ ۔انکوائری رپورٹ ءِ رد ءَ خپل واک ھما وھدی کشک بوتگ کہ آئی ءِ دست ءَ چی یے بوتگ ھمے چی ءَ  امریکی فوجی وتکوش تراک ءِ بٹن سرپد بوتگ۔ایساف ءَ گوشتگ کہ خپل واک ءِ مرگ سکیں بژنے کارے ءُ آ گوں آھانی کھول ءَ دلی ھمدردی کن اَنت ۔ بی بی سی گلوبل نیوز ءِ ڈائریکٹر پیٹر بورکس ءَ یک بیانے ءِ تہ ءَ احمد اُمید واک ءَ دروت گوشان ءَ گوشتگ کہ اے المی اِنت کہ اھوالکارانی جان پھریزگ بہ بیت داں جھان آئی ءِ ھالاں اِش بہ کونت ۔زانگ بہ بیت کہ احمد خپل واک ھمے سال ءِ جولائی ءِ ماہ ءَ طالبانانی یک اُرشے ءِ میان ءَ جنگ بوتگ آ وھد ءَ ھمے ھال بوتگ کہ آ شدت پسندانی تیر ءَ کشتگ ۔خپل واک ءِ مرگ ءَ پد اے ھال دیم ءَ اَتکگ اَنت کہ پمیشکا بی بی سی ءَ لوٹ کرتگ کہ اے ھبر ءِ سر ءَ پول کنگ بہ بیت  کہ احمد اُمید چونیں جاورانی تہ ءَ جنگ بوتگ ۔ بی بی سی ءَ  یک بیانے ءِ تہ ءَ  نیٹو ءِ کمان ءَ کار کنوکیں میان اُستمانی فوج ءَ گوشتگ کہ آ احمد ءِ مرگ ءِ سر ءَ پول بہ کن اَنت ءُ چَہ آئی ءِ آسر ءَ بی بی سی ءُ احمد ءِ کھول  ءَ بہ ڈس اَنت ۔ بیست ءُ پنچ سالیگیں احمد اُمید ھما وھد  ءَ کشگ بوتگ کہ ارزگان اُستمان ءِ کوچگی دمگ ترین کوٹ ءِ یک ٹی وی ءُ ریڈیو اسٹیشنے ءِ سر ءَ اُرش کنگ بوتگ اے اُرش ءِ تہ ءَ باز دگہ مردم مرتگ ۔ طالبان ءَ اے اُرش من اِتگ بلے آھاں گوشتگ کہ احمد ا٘مید آھاں نہ کشتگ ۔ آھاں اے کار ءِ بھتام سرکاری فوجانی سر ءَ لڈ اِتگ کہ دومی نیمگ ءَ یک ھَندی ھال رسان ایجنسی ءِ گوشگ بوتگ کہ احمد ا٘مید امریکی فوجیاں کشتگ ۔ احمد ءِ برات ءِ گوشگ اِنت کہ احمد ءَ من ءَ دو ٹکیسٹ میسج کرتگ ۔ یکے ءِ تہ ءَ نوشتگ کہ من چیر آں ، مرگ اَتکگ دومی تہ ءَ نوشتگ کہ اگاں من مرت آں گڑا پہ من ءَ مرادوند بہ بئے ۔ احمد چَہ دوھزار ھشت ءَ گوں بی بی سی ءَ ھمگرنچ بوتگ ۔