ترکی ءَ کار بم تراکے ءَ سئے مردم بیران ' ترکانی کردستان ءِ سر ءَ اُرش ءِ بیھار

انقرہ : ترکی ءِ بنجاھی شھر انقرہ ءَ بوتگیں یک مزنیں  کار بم تراکے ءَ سئے مردم بیران ءُ پانزدہ ٹپی بوتگ چَہ ٹپیاں پنچ سک نہ گیگ اِنت ۔ اے  تراک یک سرکاری ماڑی ءُ سکینڈری اسکولے ءِ گور ءَ بوتگ ، چَہ ایشی ءَ نزکیں ماڑی ءُ کش گور ءِ ماڑیانی دپ ءَ اُوشاتگیں گاڑیاں تاوان رستگ ءُ بازیں گاڑی  بن ھم گیپتگ ۔ اے رد ءَ ترکی ءِ تھی کارانی وزیر ادریس نعیم ساہن ءَ گوشتگ کہ اے تراک ءِ مول چَہ گیش ءَ گیش تاوان دیگ اَت پرچا کہ پہ ایشی ءَ انچیں جاھے گچین کنگ بوتگ کہ گاڑی ءُ پادھانی روک سک باز اِنت ۔ دنگیت ھچ رنگیں ٹکے ءَ اے ذمہ واری وتی سر ءَ نہ زرتگ ۔ کرد آزادی لوٹوک  چَہ گوستگیں بازیں سالاں پہ آزاد کردستان ءَ گوں ترکی ءَ جنگ کنگ ءَ اَنت ءُ انوگیں روچاں آھاں ترکی ءِ سر ءَ وتی اُرش گیش کرتگ اَنت وھدے کہ ترک اُگدہ داراں ھم گوں عراق زمین ءَ زور ھوار ترینتگیں کردستان ءِ سر  ءَ گوں زمینی فوج ءَ اُرش  کنگ ءِ بیھار داتگ ۔