توار ءِ شونکار خادم لھڑی ءِ آوار جنگ ءُ توار ءِ بند کنائینگ ءِ جھد بوگ ءَ اِنت

شال :  ھالتاک توار ءِ  تہ ءَ چاپ بوتگیں یک دلگوشی جارے ءِ تہ ءَ اے گوشگ بوتگ کہ توار ءِ شونکار خادم لھڑی  ءِ آوار جنگ ءِ جھد بوگ ءَ اِنت پہ ایشی ءَ لھتیں چیریں واکدار یکوی آئی ءِ  چاریگ اَنت ایشی ءِ مول آئی ءَ دزگیر کنگ ءُ توار ءَ بند کنگ اِنت اے گمان اِنت کہ آ آوار جنگ ءُ گوں آئی ءَ ھم ھما رنگ ءَ کنگ بہ بیت کہ گوں دگہ آوار حتگیں مردماں کنگ بوتگ ۔توار ءَ نوشتگ کہ گوستگیں ھپت سال ءَ کمیں وسیلہ ءُ نہ گیگیں جاورانی تہ ءَ توار ءَ وتی اھوالکاری ذمہ واری پیلو کرتگ اَنت اے میان ءَ ادارہ ءَ چَہ بازیں نیمگ ءَ بیھار رستگ ۔ ایشی ءِ مول ھمے بوتگ کہ توار چَہ راست گوشی ءُ نترسیں اھوالکاری ءَ دزکش  بہ بیت بلے توار ءَ اے بیھار ءُ وڑ وڑیں رنگ ءَ کرتگیں انگیرانی پرواہ نہ داشتگ ۔ایشانی مستریں سبب اِیش اَت کہ توار ءَ بلوچستان ءُ بلوچ راج ءِ جاور ءُ گوں آھاں بیوکیں کارپد دنیا ءِ دیم ءَ پدر کرتگ اَنت بلکیں ھمک توار ءِ برز کنگ ءِ سبب جوڑ بوتگ کہ بلوچستان ءُ بلوچ راج ءِ پجیگ ءَ ، چیر دست ءُ شکنجہ کرتگیں راج ءُ ٹکانی حقانی پانک جنوک اَنت بلے توار ءَ جبر ءِ لیکو ءُ گوستگیں ٹکچاری ءِ بدل ءَ برز یں انسانی دودمان داریں انسان دوستیں لیکو ءُ پگر دیمروی داتگ ۔ اے پگر ءُ سسا ایوک بلوچ راج ءِ نہ اَنت بلکہ سرجمیں جھان ءِ انسانیت ءِ پھریزگ ءُ زندمانی ءِ مڑاہ ءِ مانزمان اَنت ۔ توار ءِ کردار اے وھدے پہ واکدار ءَ چَہ اُوپار ءَ ڈن اِنت وھدے بلوچستان  ءَ ھر روچ سیاسی سروک  ءُ کارکنانی پجیگ ءَ زند ءِ جتائیں تک ءُ پھناتاں بندوکیں بلوچ آوار جنگ ءَ پد شکنجہ کنگ ءُ آھانی شرینتگیں میتانی وایرانگ ءَ دور دیگ ءِ جبرانکیں کار ءُ کارپد دنیا ءِ دیم ءَ پد رکرتگ اَنت ۔ ھما بلوچ دژمن ءُ انسانیت ءِ دژمن کہ آھاں واکدار چیر دیگ لوٹ اَنت آ ھالانی ءُ کالمانی تہ ءَ پدر کنگ بوتگ اَنت ۔ پمیشکا توار ءِ اے کردار پہ واکداراں  ھچ رنگ ءَ مناک نہ اَت ، پہ ھمے کار ءَ آھاں توار ءِ نِگُٹ کنگ بنا کرتگ ءُ لھتیں چیریں واکانی ھمے جھد اِنت کہ آزاد ، بے ریا ءُ چَہ سیاست ءَ گستائیں توار بند کنگ بہ بیت ۔ پہ ایشاں جبرانک ءُ زوراکیں کار بندات کنگ بوتگ اَنت ۔ درساں پیش اے سرگرمی توار ءِ کارگس ءَ کانپول ءُ پستول جوڑ کنگ  ءُ بنا کنگ بوتگ  ۔ فون کنگ ءُ دگہ رنگ ءَ بیھار دیگ بوتگ وھدے کہ چَہ ایشاں توار ءِ ترسینگ ءَ سوبمند نہ بوت اَنت گڑا نوں توار ءِ شونکار ءِ کشگ ءَ سر گیپتگ اَنت ۔ چَہ اے سنگین ءُ بیھار ناکیں جاوراں توار ءِ چاپگ یک گرانیں کارے جوڑ بوتگ ۔ بلے پد ءَ ھم توار ءِ اے جھد اِنت کہ آ وتی اھوالکاری ذمہ واریاں یکشلی برجا  بہ دار اِیت بلے ھما ذمہ واری کہ توار ءَ وتی سر ءَ زرتگ کہ دنیا ءِ چیر دست ءُ جبر آماچیں راجانی پجیگ ءَ انسانیت ءِ پھریزگ ءُ برجاھی ءِ سوال ءِ دیم ءَ آرگ ءَ بندوک اِنت  پمیشکا نہ ایوک ءَ بلوچ راج بلکیں توار دنیا ءِ ایمنی ءُ دادرسیں ، انسانی حقانی پانک جن ءُ ھیال درشان کنگ ءِ آجوئی وت ءَ پلہ مرز گوشوکیں اھوالکار ءُ میان اُستمانی تک ءِ مردماں لوٹ کنت کہ آ توار ءِ ھلاپ ءَ بیوکیں چیریں واکانی سرگرمیانی دارگ  ءَ وتی کردار ءَ پیش بہ دار اِیت ۔