ناسا : شش روچ ءَ پد وتساچیں سیارہ زمین ءَ کپ اِیت ' مہ ترس اِت زر رس اِیت

ناسا : پنچ ٹن ءِ وتساچیں سد ءُ بیست سال کوھنیں سیارہ بیست چار ستمبر ءِ نزیک ءَ زمین ءِ سر ءَ جاھے ءَ کپ اِیت ۔ناسا ءَ اے درگت ءَ گوشتگ کہ وتساچیں سیارہ چَہ وتی گردش ءِ مدار ءَ درکپتگ ءُ نوں آ سیکنڈَے ھشت کلومیٹر تیزی ءَ گوں زمین ءِ سر ءَ کپ اِیت ۔ ھما جاہ ءَ کہ ایشی ءِ گپ ءِ گمان ھست آ اُود ءَ مزنیں شھر آباد اَنت ، ناسا ءِ گوشگ ءِ رد ءَ سستگیں وتساچیں سیارہ چَہ استواء ءِ لیکار ءَ ھپتاد ءُ پنچ ڈگری گوریچان یا زربار ءَ ھپتاد ءُ ڈگری ءِ سر ءَ جاھے کپ اِیت بلے چَہ اے گپ ءَ کس ءَ ترسگ نہ لوٹ اِیت پرچا کہ چَہ خلا ءَ سستگیں گیشتر وتساچیں سیارہ چَہ زمین ءَ کپگ ءَ پیسر پُر بنت ءُ اگاں چوش مہ بیت ناسا گوش اِیت کہ پہ پٹ ءُ پول ءَ جوڑ کرتگیں وتساچیں سیارہ یو اے آر ایس ءِ زمین ءِ سر ءَ کپگ ءَ گمانی سئے سد مردم ءِ تہ ءَ ایوک یک مردمے مرت کنت ۔ سائنسدان اے سیارہ ءِ زمین ءِ سیمسر اں آیگ ءِ ایوک دوکلاک پیش اے گوشت کن اَنت کہ کجا کپ اِیت بلے آ اے اندازہ جتگ کہ زمین ءِ سیمسراں گوزان اے سیارہ بیست ءُ چار بھراں بیت ءُ ایشی ءِ پرشتگیں سامان چارسد یا پنچ سد کلومیٹر ءَ شنگ اَنت ۔ناسا ءَ گوشتگ کہ  چَہ ایشی ءِ گیش مئے مھلوک پھریزی ءِ پیش بندی جوانتر اِنت کہ دہ ھزار ءِ تہ ءَ یک مردمے ءِ مرگ اِنت ۔یو اے آر ایس خلائی بالیگ ڈسکوری ءِ کمک ءَ نوزدہ سد ءُ پنجاہ ءُ یک ءَ خلاءَ دیم دیگ بوتگ ءُ سال دوھزار پنچ ءَ ریٹائر کنگ بوتگ ۔ چَہ ایشی ءَ پیش نوزدہ سد ءُ ھپتاد ءُ نو ءَ یک وتساچیں سیارھے ءَ  چَہ یواے آر ایس ءَ پنچ ھمنیچک مستر بوتگ ، زمین ءِ سر ءَ کپتگ ءُ تباہ بوتگ ۔ آ روکپتی آسٹریلیا ءَ کپتگ آ وھد ءِ آسٹریلیا ءِ سرکار ءَ پہ آئی ءِ پرشتگیں سامانانی چنگ ءِ دزمز ءَ چَہ امریکہ ءِ سرکار ءَ چارسد ڈالر گیپتگ ۔اے ھساب ءَ کہ ناسا ءِ گوشگ اِنت کہ اگاں وتساچیں سیارہ ءِ زمین ءِ سر ءَ کپگ ءَ ھچ رنگیں تاوان نیست بلکیں اگاں ملکے ءَ واک بہ بیت ناسا پہ وتی وتساچیں  سیارہ ءِ سامانانی چنگ ءُ یکجا کنگ ءَ دزمز ھم دنت ، اے چَہ آزمان ءَ زر ءِ ریچگ ءَ ھساب بیت۔