برطانيا: تَب زانتيں مشین کہ مَردمانى دُروگاں هم گِپت كنت

برطانيا (سائنس) برطانيا ءِ سائنسداناں يک اَنچیں تَب زانتيں مشینے جوڈ كُتگ کہ مَردمانى دُروگاں هم گِپت كنت، ايشى ءِ تها نوكيں ٹیکنالوجی گوں "کمپیوٹر سافٹ ویئر" ءُ دُزّ  کیمره كارمرزگ بنت، اے مشین يک نوكيں هُنرمندى ئے ءِ گُم ءَ انسانی مئيل ءُ مارِشت ءُ هون ءِ پنژار ءُ ساهدار ءِ بدن ءِ تها كسان كسانيں بدلى سَدلياں هم سِہرا كنت، ءُ "لائی ڈیٹیکٹرز ٹیسٹ" تکنیک ءِ كمک ءَ لُنٹانی سُرینگ، ساه ءِ كَشّگ ، لُنٹانی سرا زُبان ءِ گردینگ، پونزءِ سرا هيد، چمّانی سُرینگ ءُ دگہ بازیں تہ ءُ توكى تَب ءُ مئيلاں پدّر كنت، ايشى ءَ ابئيد يک "تھرمل امیج کیمرہ" يے كُمک ءَ چمّ ءِ کونس ءِ چیر ءِ هون ءِ گردگ ءَ هم مانیٹر كنت، آيوكيں وهد ءَ اے سسٹم پولیس ءُ سيمسرانى سرا سیکورٹی ءِ هاترا كارمرزگ بيت، ايشى ءَ دہشت گرد ءُ بيرانكاريں مَردمانى دَرگیجگ ءَ سوب مندى رَسيت، چیریں کیمره ٣ میٹرءَ گِستا جنگ بنت، پٹ ءُ پول ءِ وهد ءَ كُتہکاراں هچ سَما نہ بيت کہ پٹ ءُ پول بیئگ اِنت، برطانيا ءِ سائنسى زانتكارانى گوشگ اِنت کہ اے تکنیک زوت برطانيا ءِ بالى پٹانی سرا جنگ بيت، بلے برطانيا سركارءِ نيمگ ءَ دنیگہ اے تکنیک ءِ كارمرزگ ءِ سوڈگ کنگ نہ بیتگ، اے سرجمیں تکنیکءَ "پولی گراف" ءِ نام ديگ بیتگ،  كہ طلبی ایں مَردم ءِ هون ءِ پنژار، دل ءِ دِريک دِريک ، ساه كَشّگ ءِ رپتار ءُ پوست ءِ چير ءِ "الیکٹرانز" آنى كار كِرداں هم كساس كنت، اے تکنیک پروفیسر حسن اوجیل ءِ سربراهی ءَ "ٹیسٹ یونیورسٹی آف بریڈفورڈ" ءِ ٹیم ءَ راهبند داتگ، پروفیسر حسن اوجیل ءَ گوشتگ اے تکنیک ءِ مول ءُ مراد يک انچیں ٹیکنالوجی ءِ ديم ءَ آرگ اِنت کہ پہ دروگانی گِرگ ءِ واستہ جوانيں توجيلے بيت، "پولی گراف" بيست ءُ يكمى كَرن ءِ جوانتريں   ٹیکنالوجی گوشگ بيت، نوكيں هپتگ ءَ ديمدرائى "برٹش فیسٹیول آف سائنس" ءَ كنگ بيت.