کراچی : گیس نہ رسگ ءِ سب ءَ روچے دہ دہ کلاک ءَ لین نہ بیت

کراچی : گیس نہ رسگ ءِ سبب ءَ کراچی الیکڑک سپلائی کمپنی ءَ باپاری ءُ نند جاھی دمگاں لوڈ شیڈنگ ءِ دوران  گیش کرتگ ءُ دہ کلاک کرتگ ۔ کے ای اس سی ءِ جارکش ءَ گوشتگ کہ کم گیس رسگ ءِ سبب ءَ اے کار کنگ بوتگ ۔ آئی ءَ گوشتگ کہ کمپنی ءَ  یک سد ءُ ھشتاد ملین مکعب فٹ گیس رسگ ءَ اِنت ءُ ایشی ءِ پریشر ھم سک کم اِنت ۔ پہ لوڈ شیڈنگ ءِ دارگ ءَ کے ای ایس سی ءَ دو سد ءُ شست ملین مکعب فٹ گیس پکار اِنت ۔ پریشر ءِ کم بوگ ءِ سبب ءَ دوسد ءُ بیست میگا واٹ لین پیداک کنوکیں کورنگی پاور پلانٹ ھم بند کنگ بوتگ ۔ زانگ بہ بیت کہ پیسر ءَ کراچی ءِ پجیگ ءَ پاکستان ءِ گیشتر بھر ءَ چَہ سوئی ءَ گیس دیگ بوتگ بلے ھما اِنت  کہ پاکستان ءَ گوں بلوچاں یک رندے پد ءَ پیڑاتگ ءُ اے جنگ ءِ تہ ءَ بلوچ راجدوستیں سروک نواب اکبر خان دو ھزار شش ءَ شھید کرتگ ، بلوچاں ءُ گچینی ڈیرہ بگٹی ءِ مردماں جَھ جتگ ءُ گیس پائپ لائن ءُ گیس ءِ چاتاں یکوی تاون دیان اَنت چَہ ایشی ءَ  پاکستان ءِ مزنیں شھراں گیس کم بوتگ ، کراچی ءَ چَہ سندھ قادر پور گیس پلانٹ ءَ ھم گیس دیگ بوگ ءَ اِنت بلے اے پہ سرجمیں پاکستان ءِ لوٹ ءِ پیلو کنگ ءَ کم اِنت ۔