تپاکیں راجانی گل ءِ شست ءُ ششمی سالینہ دیوان ءِ بنگپ

واشنگٹن : تپاکیں راجانی گل ءِ سالینہ دیوان ءِ چَہ درساں مستریں بنگپ اُستمانی بدلیانی لوٹ ءِ سر ءَ چست بیوکیں ھما لس زرمبش بنت کہ اے سال ءِ بندات ءَ چَہ مصر ءُ تیونس ءَ بنا بوتگ اَنت ءُ نوں لیبیا ، یمن ءُ شام ءِ پجیگ ءَ بازیں ملک اِش گور جتگ ۔ اے سال ءَ مارچ ءَ یمن ءَ پہ اُستمان ءَ لوٹ کنوکیں بازیں مردمانی کشگ بوگ ءَ پد  پہ تپاکیں راجانی گل ءَ یمن ءِ گوستگیں سفیر عبداللہ سعدی چَہ وتی اُگدہ ءَ دزکش بوتگ  نوں آ نیویارک ءَ یک پٹ ءُ پولی ادارہ ، انٹرنیشنل پیس انسٹی ٹیوٹ ءَ گوں ھمگرنچ اِنت ءُ آئی ءِ گوشگ اِنت کہ پہ اُستمانی زرمبش ءَ پد ھم اے ملکاں پہ اُستمان ءِ برجمی ءَ میان اُستمانی تک ءَ کمک پکار اِنت ۔ آگوش اِیت کہ بازیں ملکاں مالی کمک لوٹ اِیت وھدے کہ لیبیا رنگیں لھتیں ملک وتی تیل ءِ مڈیانی سر ءَ ھم بوت کنت ۔ شام ءُ یمن ءَ مالی کمک ءِ پجیگ ءَ سیاسی کمک ھم لوٹ اِیت ۔ اے ملکاں آمریں سرکارءِ ھلاسی ءَ پد پہ اُستمان ءِ برجمی  ءَ ھم میان اُستمانی تک ءِ کمک ءُ ھمکاری لوٹ اِیت ۔ گوستگِں سال ءَ گوں جنرل اسمبلی ءَ تران کنان ءَ امریکہ ءِ صدر باراک اوباما ءَ گوشتگ کہ اے سال ءَ فسلطین ھم تپاکیں راجانی گل ءِ باسک ملکانی لڑ ءَ ھوار بیت ۔ بلے چَہ ازارئیل ءِ نیمگ ءَ یہودیانی میتگ جوڑ کنگ ءِ کار ءَ دست نہ کشگ ءِ سبب ءَ ازرائیل ءُ فسلطین ءِ میان ءَ گپ ءُ تران مھتل بوتگ اَنت ۔ فلسطین ءِ صدر محمود عباسی ءَ گوشتگ کہ آ پہ یک آزاد فسلطینی ریاست ءِ جوڑ کنگ ءَ اے سالی تپاکیں راجانی گل ءِ تہ ءَ پہ باسک بوگ ءَ جھد کنت ۔ امریکہ ءُ یورپی ملکانی سفیراں پہ فلسطین ءُ ازرائیل ءِ میان ءَ ھستیں شور ءِ دارگ ءَ یک رندے پد ءَ گپ ءُ تران ءِ بنا کنگ ءِ ارزشءِ نیمگ ءَ دلگوش گور کنائینگ ءَ اَنت ۔ امریکہ ءِ  ڈنی کارانی کارگس ءِ جارکش وکٹوریہ نولینڈ ءَ گوشتگ کہ اگاں پہ تپاکی راجانی  گل ءِ باسکی ءَ فلسطین ءِ لوٹ داں سلامتی کونسل ءَ سر بوت گڑ ا امریکہ ایر ئِے جنت ۔ بلے عبداللہ سعدی گوش ایت کہ فلسطین چَہ وتی لوٹ ءَ پشت ءَ نہ کنز اِیت پرچا کہ فلسطینیانی گور ءَ دگہ راھے پشت نہ کپتگ ابید چَہ ایشی ءَ کہ آوتی لوٹ ءَ تپاکیں راجانی گل ءِ دیم ءَ ایر بہ کن اَنت کہ یک واتواکیں فلسطین ئیگ اِنت کہ چار جون نوزدہ شست ءُ ھپت ءِ سیمسرانی سر ءَ بہ بیت ۔ تپاکیں راجانی بنداتی دیوانانی تہ ءَ زرد ویگ ، کینسر ، پپ ءُ دلانی نادراھیانی سر ءَ ھم گپ جنگ بیت کہ سرجمیں جھان ءَ ھر سال چَہ اے نادراھیاں سئے کروڑ شست لکھ مردم بیران بیت ۔ چَہ ایشی ءَ ابید صومالیہ ءِ ڈکال ، اوگانستان ءِ جنگ ءُ جوھری سلاھانی شنگ بوگ ءَ  دارگ رنگیں بنگپانی سر ءَ ھم  جیڑگ بیت بلے ھوکہ اے دیوان ءِ تہ ءَ ابید چَہ فلسطین ءَ دگہ ھچ چیر دستیں راجانی سر ءَ گپ جنگ ءِ اُوست ءُ گمان نیست ۔