24ستمبر ءَ خضدار ، مستونگ ، کلات ءَ بی این پی نیمگ ءَ دربندی ءِ جار جنگ بوتگ

شال : بلوچستان نیشنل پارٹی ءَ چَہ خضدار ءَ پارٹی ءِ باسک غفور رودینی ءِ تیر جتگ ءُ دیم شرینتگیں میت ءِ دزکپگ ءِ ھلاپ ءَ سئے روچ ءَ پرس ءُ بیست ءُ چار ستمبر ءَ خضدر، قلات ءُ مستونگ دربندی ءِ جار جتگ ۔ بی این پی ءِ بنجاھی جارکش ءِ نیمگ ءَ شنگ کرتگیں بیان ءِ تہ ءَ گوشگ بوتگ کہ عبدالغفور رودینی ، نبی بخش مینگل ءُ دین محمد بلوچ چَہ جب چوکی ءَ آوار جنگ بوتگ اَنت ۔ نبی بخش مینگل رمضان ءِ ماہ ءَ کُشگ ءُ آئی ءِ میت دور دیگ بوتگ ءُ نوں عبدالغفور ءِ شکنجہ کنگ ءَ پد میت دور دیگ بوتگ ۔ اے رنگیں ریاستی جبر ءَ گوں بلوچ راج ءُ بی این پی ءِ باسکانی اُوست ءُ باوست نزور کنگ نہ بنت ۔ بیان ءِ تہ ءَ گوشگ بوتگ کہ ریاستی زوراکیانی گوں مزن مردی ءَ دیمپانی کنگ لوٹ اِیت ۔ عبدا لغفور ءِ میت دز کپگ انسانیت دژمنیں کار پد اِنت ۔ اے کارپد ءِ ھلاپ ءَ 24ستمبر ءَ خضدار ، مستونگ ، کلات ، 25ستمبر ءَ مکران ، 27ستمبر ءَ نوشکے ، خاران ، دالبندین ، واشک ،28ءَ حب ءُ لسبیلہ،30ستمبر ءَ جعفر آباد ءُ نصیر آباد ءَ دربندی بیت ۔ پہ ایشی ءَ مھلوک ءُ دکاندراں دزبندی اِنت کہ دربندی ءَ سوبمند بہ کن اَنت ءُ بلوچستان ءِ تہ ءَ بیوکیں نارروائی ءُ جبراکے ءِ ھلاپ ءَ وتی زھرءَ بے درشان اَنت ۔ چَہ ایشی ءَ ابید 2اکتوبر ءَ سرجمیں بلوچستان ءَ انسانی حقانی لگتمالی ءِ ھلاپ ءَ زھرشانی کنگ ءِ جار جنگ بوتگ ۔